Centre for Financial Literacy buatsaih

State Bank of India bultumin nimin khan Champhai DC pisa hmunah Champhai RBI Moneywise Centre for Financial Literacy (CFL) buatsaih a ni a, Champhai additional DC Henry C Lalrawnkima’n a hawng.

Henry C Lalrawnkima chuan, CFL chu bank leh financial institution-te dawr leh chhawr ṭangkai kawnga mipui mit tihvarna atana kawng kawhhmuhtu a nih thu sawiin, “Sorkar scheme pawimawh tak takte mi rethei leh thingtlang chengker zawka awmte’n an chhawr ṭangkai theih ngei ka beisei,” a ti a; CFL kalpui tura tih CRISIL Foundation chuan CSR khawih tura din a nih ang ngeia awmze nei taka hma a lak a beisei thu a sawi.

CFL hi Reserve Bank of India hmalakna péng pakhat a ni a, CRISIL Foundation kaltlangin hmarchhak state pali-ah kalpui a ni. Mizoramah chuan Aizawl, Champhai, Serchhip, Lawngtlai leh Mamit district-ahte kalpui tura ruahman a ni a; CFL Champhai hian Champhai, Ngopa leh Khawzawl RD block-te an vil dawn.

CFL-in a tum ber chu - thingtlang mite hnena financial literacy pek leh financial inclusion a tam thei ang ber kalpui a ni a, a bikin bank awm lohna khuaa chengte hnena financial institution leh social welfare scheme hrang hrangte hriattir tum a ni.