Khawzawl dist-ah a záwnin ni thum chhung Sample endik zawng zawngin hripui an vei

January 12, Nilaini khan Mizoramah Covid-19 vei mi 1,054 hmuh chhuah a ni a, Khawzawl district-ah a záwnin ni thum chhung swab sample endik zawng zawngin hripui an vei tawh. Nimin khan hripui vei dam tawh mi 383 chhuahtir an ni a, hripui vangin mi pakhat a thi.

Covid-19 vei Nilainia hmuh chhuahte chu mipa 491 leh hmeichhia 563 an ni a; ZMC laboratory-a hmuh 33, TrueNAT hmanga hmuh 21, RAT hmanga hmuh 993 leh FIA hmanga hmuh pasarih niin, positivity rate chu 15.09% a ni. Mi 1,054 zinga mi 711 (67.48%) chu natna lang chhuak (symptom nei) an ni a, mi 343-in symptom an nei lo.

Sample endikna district 11 zingah positivity percentage 10% aia a sànna district pakua a awm a, a sànna ber Khawzawl district-ah 100% a ni a; a záwnin ni thum chhung sample endik zawng zawng an positive tawh a, January 10-ah 375, January 11-ah 116 leh January 12-ah 180, an vaiin mi 671-te an positive vek a ni.

Positivity rate 10% chung lam district dangte chu - Saitual 37.53%, Lunglei 36.79%, Siaha 22.09%, Champhai 21.46%, Serchhip 18.67%, Aizawl 17.97%, Mamit 15.41% leh Lawngtlai 11.39% a ni.

IPR tarlan danin, hripui vei mi 20 aia tam hmuhna khuate chu - Tualte-ah 58, Rabungah 39, Bungtlangah 33, Mualphengah 31, Chawngtlaiah 30, Khawhai leh Chungtlangah 20 ve vete niin, symptom nei vek an ni a; Bualpui V-ah 40 leh RIPANS-a 27-te pawh a tam berin symptom an nei a, Rullamah 29, Lungpho-ah 23 leh Zote South-a 20-te'n symptom an nei lo vek thung.

Hetih lai hian, Aizawl Chanmari-a mi pakhat chu tun hnaia Dubai aṭanga haw a ni a, Ṭhuampuia mi pakhat pawh Saudi Arabia aṭanga haw a ni.

Nimin tlai dar 5 thleng khan hripui vei dam tawh mi 383 chhuahtir an ni a; district tina chhuak zat chu - Serchhipah 92, Aizawlah 79, Mamitah 78, Lungleiah 37, Saitualah 24, Khawzawlah 22, Champhaiah 16, Siahaah 15, Lawngtlaiah 11 leh Kolasib-ah pakua an ni.

IDSP record angin, Mizoramah Covid-19 vei 1,49,492 hmuh chhuah a ni tawh a, mipa 71,752 leh hmeichhia 77,740 an ni. Nimin tlai dar 5 thleng khan mi 1,41,914 (94.93%) chhuahtir an ni tawh a, mi 565 (0.38%) thi tawhin, enkawl mek mi 7,013 (4.69%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,49,492 chu mi 1,000 zelah hripui vei mi 136 an awm ang a ni a; mi 1,00,000 zela Covid-19 vangin mi 51 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 11, 2021 thlenga swab sample endik tawh 15,60,618 aṭanga RT-PCR hmanga endik zat percentage chu 21.33 a ni a, RAT hmanga endik zat chu 72.87% a tling.