KHAWTHLIR

Covid-19 dona atan nimin khan mimal leh pawlte'n CM Relief Fund-ah pawisa an thawh leh a, chu'ngte nen chuan nimin tlai dar 4 thleng khan cheng nuai 1955 a lut tawh. Nimin bikah chief minister Zoramthanga'n June thla hlawh (basic pay) aṭanga 60% - Rs. 48,000 a thawh a, minister of state Dr K Beichhua'n MLA-LADS fund aṭangin Rs. 25,00,000 a thawh bawk. CM Relief Fund hi cheng nuai 1033 hman tawh niin, hman loh nuai 921 a la awm a ni.

Aizawla Salvation Army Youth (SAY)-te chuan Founders Day vawi 66-na pualin July 2, Ningani khan Aizawl Civil Hospital-ah thisen Unit 90 an pe a, a petute mipa 54 leh hmeichhia 36 an ni.

Nimin chawhnu dar 2:35 khan Mizoramah magnitude 4.6 a náin lìr a nghîng a, thil tihchhiat lian tham a neih hriat a ni lo. Lir­nghing inṭanna chu Champhai district-a Farkawn aṭanga km. 3 vela hláah a ni a; Farkawn khawtlang hruaitute hnen aṭanga thu dawn danin, lirnghing hian sâwi na ang reng viau mah se, thil tihchhiat a neih an hre lo a ni.

Confederation of Indian Industry leh Health Services department hnuaia Food & Drug Administration-te chuan nimin khan Online Digital Training Workshop & Licensing Mela an buatsaih. He hunah hian Aizawla anganwadi worker-te

leh pre-school neitute Food Safety and Regulation 2011 chung­chang zirho a ni.

Palak bialtu MLA KT Rokhaw chuan nimin khan Tipa (Tuipang) damdawi-in (primary health centre) hnenah tui in tur tihthianghlimna leh dah vawhna (water cooler) a pe a, personal protective equipment, hmai tuamna leh hand sanitiser bur eng emaw zat leh Rs. 7,000 a pe bawk.

Nimin khan Lunglei Civil Hospital laboratory-a Truenat kháwl hmangin swab sample 18 endik a ni a, July 2, Ningani khan sample 11 endik a ni bawk. Ni hnih chhunga swab sample 29 endik zingah Covid-19 vei hmuh chhuah an awm lo.