Champhai NGO-ten Bawrhsap sawnna thupek sût an phût

Champhai District Joint NGO-te nimina ṭhukhawm chuan, Champhai bawrhsap Maria CT Zuali transfer order, January 13, Ningania tihchhuah chu January 18, 2022 ral hmaa sût turin Mizoram sorkar an phût a, nimin vek khan DC transfer order an hâl.

Champhai district-a NGO hrang hrang hruaitute hi YMA Sub-Headquarters, Champhai pisaah an ṭhukhawm a, Champhai bawrhsap Maria CT Zuali sorkarin sawn chhuah a tum chungchang an ngaihtuah.

He hunah hian Champhai District NGO Coordination Committee, Sub-Hqrs YMA, MHIP Sub-Hqrs, MUP, MZP, Champhai Ṭhalai Pawl, MZI, Champhai Nature Conservancy aiawhte an tel nia thu dawn a ni.

Thu dawn danin, Champhai district-a páwl hrang hrangte chuan, DC transfer order chu an hun tiam, January 18, kar leh Thawhṭanni ral hmaa sût a nih loha hma an lâk zui dan tur pawh an ngaihtuah nghal a; Maria CT Zuali chu a chhuah loh nan DC complex gate bulah a ṭul chen chen camp siam an tum a ni.

Hnam dang lirthei, dan loa Myanmar aṭanga bungraw lak luh an phurh leh phurh loh enfiah an rél bawk.

Hetih lai hian, Kolasib District All NGO Coordination Committee pawh zanin hian Sub-Headquarters YMA pisaah an ṭhukhawm dawn a; Kolasib bawrhsap Dr H Lalthlangliana sawn chhuahna tur thupek sorkarin a tihchhuah chungchang an ngaihtuah dawn a ni.

Tarlan tawh angin, Champhai DC Maria CT Zuali leh Kolasib DC Dr H Lalthlangliana te bakah, MCS officer eng emaw zat sîksawina thupek chu January 13, 2022 khan Mizoram sorkarin a tichhuak a; Maria CT Zuali chu additional secretary, Planning leh FCSCA department-ah awm tura tih niin, Dr H Lalthlangliana chu School Education director ni tura ruat a ni.

Champhai District NGO thuchhuak
1. Vawiin 14.1.2022-a Champhai District NGO hrang hrang emergency meeting chuan Champhai DC Pi Maria CT Zuali transfer a ni hi ṭha kan ti lo a; a rang thei ang bera transfer order sût turin Mizoram sorkar kan phût a ni. Dt. 18.1.2022 ral hmaa transfer order sût a nih loh chuan hmalak zel dan tura ruahman angin kalpui a ni ang.
2. Dan leh thupek dik taka kengkawh a, dik taka roreltu Champhai DC Pi Maria CT Zuali, Champhai district-in a mamawh lai taka Champhai a chhuahsan hi rem kan ti lo.
3. Champhai DC sawn chhuak tura sorkarin a tih hi kan pawm lohzia lantir nan transfer order copy hi hâl nghal a ni.