Sorkar hnathawk hlawh bat sak Sawi bawrhban a vanduaithlak - Robert Romawia
Minister of state Robert Romawia Royte chuan, sorkar hnathawkte hlawh Mizoram sorkarin a bat ṭhensak chungchang chu party politics vanga sawi bawrhbáng duh an awm chu vanduaithlak a tih thu a sawi.
Robert Romawia Royte hian nimina Darlawn an tlawhnaah thu sawiin, Covid-19 leng vanga mipui harsatna hria a, sorkar hnathawkte hlawh aṭanga eng emaw zat sorkarin a bat ṭhensak thu a sawi a, "Mihringpuite ṭanpuina remchanga ngaia phunchiar pakhat mah an awm lo leh mahni hlawh thawh phalte an pung zel te, lawm taka an hlawh thawh phal an awm zel hi a ropui a ni. Party politics vanga sawi bawrhbâng duh an awm erawh hi chu a vanduaithlak hle a ni," a ti.
Hun rei tak Covid-19 vanga hna thawk thei loa sorkar leh mipui an awm avangin mipuiin sum leh pai leh ei leh barah harsatna an tawh nasat thu sawiin Robert Romawia chuan, "Pathian zara Covid-19 hri a reh chhoh mek lai hian, hmasawnna hnathawh ṭan theih a beiseiawm," a ti a; budget-a hnathawhna tura sum awm sa bank-ah emaw dah táng mai lo a, a hmanna tura ruahman sa thawh zung zung chu sorkar sumin miretheite hnen a thlen theih dan tur a nih avangin dan phal chhungah hmalak zung zung ṭul a tih thu a sawi bawk.