MJA, Hnahthial District hawn a ni

MJA, Hnahthial district thar chu nimin khan Hnahthial College auditorium-ah MJA General Headquarters president Zonunsanga Khiangte-in a hawng.

Hnahthial district MJA hawnna inkhawm hi MJA Gen.Hqrs vice president Lalremsiama'n a kaihruai a; Zonunsanga Khiangte chuan, Hnahthial district MJA hawn a ni ta chu MJA tan ni chhinchhiah tlak leh pawimawh tak a nih thu a sawi a; MJA chu Mizorama páwl awm zingah member-te inpawh leh innêl ber an nih thu sawiin, "Kan profession avanga inphuar khâwm kan ni a, NGO kan ni lo. Ni tin thil thar kan ziak a, intah hriam reng a ngai a ni," a ti.

MJA Gen.Hqrs Presi­dent chuan, MJA-in hnam inpumkhatna a ngaih pawimawh thu sawiin, "Chî leh chî inngeihtlanna MJA chuan a ngai pawi­mawh tak zet a ni," a ti a; hnam inpumkhatna leh chî leh chî inngeihna atan MJA-in theihtawp a chhuah ṭhin thu a sawi.

Inkhawmah hian Lunglei district MJA pre­sident H Lalthansanga leh Hnahthial district MJA president F Zosang­liana te pawhin thu an sawi a; Hnahthial DC R Lalremsanga, SP Lalbiak­killa, Lunglei IPRO C Lalrem­ruati leh Hnahthial VC leh khawtlang hruai­tute'n an hmanpui a ni.

Hnahthialah hian kum 2009 khan Lunglei district MJA hnuaiah sub-division angin an awm ṭan a, member paruk an awm mek. District an nih hnuah district MJA puitlingah hawn a ni ta a ni.