Sorkar ṭha lo hnuaiah dik leh ṭha taka hna thawktute an chêp ṭhin - ZLP Dy.Leader

ZPM Legislature Party (ZLP) deputy leader Vanlalhlana chuan, sorkar ṭha lo hnuaiah dik leh ṭha taka hna thawktute an chêp ṭhin thu sawiin, dan rorelna ram, Mizo Kristiante chênna ni àwm rêng sorkar Mizoramah din turin ZPM-in hma an lak zel dawn thu a sawi.

ZLP Deputy Leader hian nimin khan Kolasib Press Club-ah thuthar thehdarhtute a kâwm a; January 13, Ningani khan Mizoram nghawr dawtin sorkar hnathawk sîksawi a nih thu leh chu chu mipuiin mak an ti hle tih sawiin, "Sorkar ṭha lo hnuaiah dik tak leh ṭha taka thawktute an chêp a, sorkar kawng dâltu leh hnawk an ni ṭhin. Mipui aiin mi tlem tê hlâwkna ngaih pawimawh a ni ṭhin. Mi ṭha leh dikte chu a tuartu an ni ṭhin," a ti.

Vanlalhlana chuan, Kolasib DC Dr H Lal­thlang­liana Kolasib dis­trict-a a thawh chhungin ramri buai, Covid-19 dona leh zangnadawmna chung changa a hnathawh an hriat thu sawiin, "Mipui kan thla a muang a, ram pumah fak a hlawh niin kan hria. Hetianga ramri humhalh kawnga hmalak laia dan loa sumdawng dâltu Champhai DC nena chawpchilh taka transfer an ni hi mak kan ti hle a ni," a ti a; Kolasib DC leh Champhai DC-te chu sorkar ṭha lo rorelna tuartu nia an ngaih thu a sawi.

Mizoramah hian sor­kar ṭha a pian a, danin awmzia a neih a, mipuite'n an dikna leh chanvo an chan hun a nghahhlelhawm tih sawiin Vanlalhlana chuan, "Sorkar ṭha hnuaiah chuan sorkar hnathawk leh mipui kan zalen ṭhin. Mi tlem tê hlâwk tumna vanga mipuiin kan tuar ṭhin hi pawi kan ti a, mi dik leh ṭha, mipui thlamuannate'n harsatna an tâwk hi hrehawm kan ti tak zet a ni," a ti.

ZLP Deputy Leader chuan, "Hetiang hi a thlen tawh lohna turin sorkar hi hma la turin kan phût tak meuh a ni," tiin, ZPM chuan dan rorelna ram, Mizo Kristiante chênna ni àwm reng sorkar din turin hma an la zel dawn tih a sawi a ni.