'Pathian leh kan ram tan' tih hi MNF hian thlâk se kan duh - MPCC

Mizoram Pradesh Congress Committee (MPCC) Media depart­ment chuan nimin khan Aizawl Press Club-ah thuthar thehdarhtute an kâwm a; MNF party chuan an auhla pakhat, ‘Pathian leh kan ram tan’ tih chu ram an hruai duh dan nen a inmil thei lo tih sawiin, thlak thei se an duh thu an sawi.

MPCC Media chair­man Dr Lallianchhunga chuan, Mizorama rorel mek MNF party chuan nasa takin Mizoram an sawp chhe mek tih sawiin, "MNF sorkarna hnuaia sorkar hnathawkte hlawh pek theih loh leh pûksak te, sorkar leiba pung nasa lutuk leh dan loa che ṭhin mi dik lote an huangtau dan aṭang hian MNF sorkar kal dan hi Mizoram tan a him lo hle tih a lang," a ti a; mi pangngai tan MNF party chu thlàwp tlak a nih lohzia a lang zel tih a sawi.

Congress sorkar laiin sorkar hnathawk nghette hlawh pek theih loh leh an hlawh pûksak a awm ngai lo tih sawiin Lallianchhunga chuan, "MNF sorkar hnuaiah erawh chuan sorkar hnathawkte'n a tahtawlin, a inchhâwkin hlawh an la thei chauh tawh. Vawiin thlenga sorkar hnathawk group A leh B-te'n December 2021 thla hlawh an lak theih loh chhan chu 2021-22 Mizoram budget-ah sorkar hnathawkte hlawh (salary) tur a dah kim theih loh vang a ni," a ti.

MPCC Media tarlan danin, sorkar document-a a lan dan chuan, kum 2020-21 budget-ah sorkar hnathawkte hlawh tur cheng vbc. 3,947 dah a nih laiin, kum 2021-22 budget-ah chuan cheng vbc. 3,745 chauh dah a ni a, a inthlauhna chu cheng vbc. 202 a ni.

Sorkar hnathawk pension-te hamṭhatna pawh kum 2019-20 budget-ah cheng vbc 1,399, kum 2020-21 budget-ah cheng vbc 1,171 leh kum 2021-22 budget-ah cheng vbc 1,124 dah a ni a, a tlem tial tial.

MNF sorkar lai anga sorkar dinhmun chhia hi Mizorama sorkar ding tawh zingah a la awm ngai lo nia sawiin Lallianchhunga chuan, "Eng dang vang a ni lo, sum leh pai enkawlna kawnga MNF sorkarin kalphung mumal a neih loh vang a ni. Kum 2012-2018 inkara Congress sorkar laia sorkar leiba punna chu cheng vbc. 2,201 a nih laiin, MNF sorkar kum thum chhung leka leiba punna chu cheng vbc 3,176 a ni," a ti a; sorkar sum dinhmun chhia chu mipuiin kum eng emaw zat an tuar dawn tih a sawi.

Dr Lallianchhunga chuan, MNF sorkar hnuaiah dan loa che ṭhin mi dik lote an huangtau zual tih sawiin, "Dik taka thil ti ṭhinte leh sorkar hnathawk ṭha tak takte nèkchêpin an awm. Sorkar hnathawkte hi sawn ṭhin an ni a, mipuiin kan hrethiam. Sorkar hnathawk transfer pangngaiah ram pum huapin mipui kan phun luih luih ngai lo. Champhai DC transfer erawh hi chuan a rûka ram páwn aṭanga kuhva la lut a, tawlh ru ṭhinte leh an thurualpuite duh dan anga transfer kalpui nia a lang hian Mizoram mipui rilru a tiná a ni," a ti a; mipui rilru natzia hriaa ngaihtuah nawn leh turin MNF sorkar a chah.

MPCC Media-te chuan, Champhai DC transfer chu dikna rahbeh tumna lian tak a nih avang leh, Mizote Kristianna thlenga tihmélhem thei a nih avangin political party-te hmalakna bakah, Mizoram mipui zawng zawng huapa hmalakna awm thei se an duh thu an sawi a; MNF sorkar paihthla a, sorkar ṭha zawk din turin theihtawp an chhuah dawn tih an sawi bawk.