Hâlpuah, adt. khapna thupek bawhchhia Aizawlah mi 26 man, thubuai 23 ziak lut
Krismas leh kum thar vuakvêta hâlpuah, hâlmawi, silai lem (a mû kâp chhuak thei) leh meithallâwn (sky lantern) khapna thupek bawhchhiat kaihhnawihah Aizawlah mi 26 man an ni a, thubuai 23 ziah luh a ni.
Krismas leh kum thar vuakvêta hâlpuah, hâlmawi, silai lem leh sky lantern khap chungchang hi nimin khan Home minister Lalchamliana hoin Secretariat Conference Hall-ah thlir let a ni a; Lalchamliana chuan, khapna thupek chungchangah kum kal tawhte ngaihtuahin, hmasawnna hmuh tur a awma a hriat thu a sawi.
Sorkar thuchhuah tarlan danin, Krismas leh kum thar vuakvêta hâlpuah, hâlmawi, silai lem leh sky lantern khapna thupek bawhchhia mi 26 man niin, thubuai 23 ziah luh a ni.
Mi 26 man zinga 19 chu hâlpuah leh hâlmawi kawl vanga man niin, mi pasarih chu hâlpuah hâl vanga man an ni a; thubuai ziah luh 23 zinga 16 chu hâlpuah leh hâlmawi kawl vanga man niin, thubuai pasarih chu hâlpuah hâltu mante laka ziah luh a ni thung.
Aizawl Police Station hnuaiah mi 12 man niin, thubuai 12 ziah luh a ni a, puak thei thil man hlut zawng chu Rs. 99,175 a tling. Bawngkawn PS-ah mi pasarih man niin, thubuai pasarih ziah luh a ni a, thil man hlut zawng chu Rs. 35,920 a ni.
Vaivakawn PS hnuaiah mi pahnih man niin, thubuai pahnih ziah luh a ni a, thil man hlut zawng chu Rs. 5,030 a ni a; Kulikawn PS hnuaiah mi panga man niin, thubuai pahnih ziah luh a ni a, thil man hlut zawng chu Rs. 60,250 a tling.
Kum hmasa lamah kum hlui thlah zanah minute 45 chhung chhum lo chat loa hâlpuah hâl a nih laiin, 2021 kum hlui thlah zanah erawh chuan minute 20 chhung chiah chhum lo chat loin hâlpuah a puak nia tarlan a ni. Hâlpuah hâl khapna thupek chu hlawhtling vek lo mah se, hmasawnna a awmah an ngai a; Lunglei leh Kolasib-ah hâlpuah hâl tlem an awm a, district khawpui dangah chuan hâl an awm lo niin an sawi.
Ṭhutkhawmah hian, khapna thupek kengkawha tlawmngaia duty YMA branch ti ṭhate hnenah Home Minister’s Discretionary Fund aṭangin lawmman pek an rel a; branch ti ṭha thlang turin Central YMA an ruat a ni.