KHAWTHLIR
Covid vaccine dose 13,73,041 pe tawh
January 13, Ningani thleng khan Mizoramah Covid-19 vaccine mi 7,69,124 hnenah dose 13,73,041 pek a ni tawh. Covid vaccine la tawh mi 7,69,124 zinga mi 5,99,715-in dose hnihna an la tawh a, precautionary dose la tawh mi 4,202 an awm bawk. January 13 bikah dose 8,853 pek a ni a, dose khatna 5,356, dose hnihna 1,789, leh precautionary dose 1,708 a ni.
Kawng siam dawn
January 17, 2022 aṭangin zing dar 9 leh tlai dar 4 inkarah PWD-in Saron Veng Modern HSS kual aṭanga Chhinga Veng (Tuithiang-Bethlehem Veng junction) inkar kawng an thawm ṭha dawn a, hei vang hian hna thawh chhungin kawng chanve khâr a ni dawn. Aizawl Traffic SP Rodingliana Chawngthu chuan, hna thawh tibuai thei tura kawngpui sira lirthei leh bungrua dah phal a nih loh thu a tarlang.
Inhlanna hun hmang
Transport department-a thawkte chuan nimin khan kum 2022 atana inhlan tharna an hmang a, Transport minister TJ Lalnuntluanga'n a hmanpui. Minister chuan, driving license pek chungchangah fimkhur zual tur leh DTO tinah counseling uluk taka kalpui turin a chah a; sorkar laipuiin tun hnaiah Khawthlangtuipui-Tuichawng inkara lawng service tir tura ruahmanna a pawm thu te, Mizoram leh Tripura sorkarin intlawh pawh theihna atana reciprocal agreement an ziah thu te, Churachandpur-ah MST bus tlantir thuai tum a nih thute a sawi.
Fire Prevention Week 2022 sawiho
Lunglei District Level Committee on Fire Prevention chuan nimin khan an chairman Kulothungan A, district bawrhsap kaihhruaiin Fire Prevention Week 2022 hman dan tur an sawiho. The Mizoram (Prevention and Control of Fire in the Village Ram) Rules, 2021 chu khauh taka kengkawh turin Lunglei district-a VC-te hriattir ni se, YMA Sub Hqrs chu kângmei laka fimkhurna turte mipui hnena hriattir turin ngen ni se, an ti.