PM hoin Covid-19 chungchang sawiho

Prime minister Narendra Modi hoin January 13, Ningani khan state hrang hrang chief minister leh union territory (UT)-a lieutenant governor/administrator-te'n virtual meeting kaltlangin India rama Covid-19 vei pung zel leh Omicron variant darh zel chungchanga hmalakna an sawiho a, chief minister Zoramthanga pawh a tel.

PM Narendra Modi chuan, state tinte chu fimkhurna thlah loa inring reng tura chahin, "Eng variant pawh lo awm se, vaccine lak hi tunah chuan he hri léng dona hmanraw pawimawh, finfiah sa a la nih reng. A ṭul anga inkhuahkhirhna siam cháng a awm a, chutihrual chuan, mipui eizawnna leh state ei leh bàr khawih na lo thei ang ber zawnga ruahman ni se," a ti.

Prime Minister chuan, Covid-19 veite chu a tam thei ang ber an in lama inenkawl (home isolation) kalpui tur leh home isolation-a awmte inenkawl dan tur ṭha taka chhuah turin state leh UT hotute a chah a ni.

Ṭhutkhawmah hian Union Home minister Amit Shah pawh a tel a; Union Health Secretary-in Covid-19 chungchanga India dinhmun a tarlang. Karnataka, West Bengal, Tamil Nadu, Jharkhand, Madhya Pradesh, Punjab, Assam leh Manipur chief minister-te'n an state dinhmun an sawi bawk.

CM Zoramthanga hi Health minister Dr R Lalthangliana, chief secretary Dr Renu Sharma, Health secretary R Lalramnghaka, NHM mission director Eric Zomawia leh officer dangte'n an ṭawiawm a ni.