Chhungkaw 50,000 tan central-ah Cheng vbc. 250 kan dil mek - Dr Thangtea

Commerce & Industries minister Dr R Lalthangliana chuan, Covid-19 léng avanga chhungkaw 50,000-te ṭanpuina tur Post Covid Economic Revival Project hnuaiah sorkar laipuiah cheng vbc. 250 dil mek a nih thu a sawi.

Commerce & Industries minister Dr R Lalthangliana hian nimin khan Mizoram Khadi & Village Industries Board (MKVIB), Zemabawka Multi Disciplinary Training Centre-ah ṭhalaite'n eizawnna kawng an neih theihna trade hrang hrang atana training buatsaih a hawng a ni.

Dr R Lalthangliana chuan, Covid-19 hripui léngin mipui eizawnna a tihchhiat leh a nghawng nasat avangin sorkar laipuiin Post Covid Economic Package cheng vbc. 1,00,000 a ruahman tih a sawi a, "Mizoramah pawh mahnia eizawnna nei mi tam takin hripui avangin an sum lak luhah harsatna an tâwk a, chhungkaw 50,000-te'n ṭanpuina an dawn theih nan vbc. 250 project, Post Covid Economic Revival Project ruahman a ni a, sorkar laipuiah dil mek a ni," a ti.

MDTC-a training-ah hian mi 82-in eizawnna tling thei tur trade 13-ah thla hnih aṭanga thla ruk chhung zir turte an zir dawn a ni.