Serchhip MJA-in Bawrhsap an thlah

MJA, Serchhip district chuan nimin khan Serchhip DC chhuak tur Kumar Abhishek chu a pisaah thlahna hun an hmanpui a, hriatrengna thilpek an hlân. Kumar Abhishek hi Delhi-ah a awm dawn a ni.

Serchhip DC chuan, Serchhip bawrhsap hna a thawh chhunga journalist-te thawhpuina ṭha a dawn avanga a lawm thu sawiin, MJA member-te chu mipui tan hna ṭangkai tak an thawk nasa tih hria a, ṭhahnemngai taka thawk zui zel turin a chah.

Kumar Abhishek chuan, Serchhip district mipui an ṭha a, kaihhruai an nuam tih a sawi rualin, hmasawn an mamawhna lai pawh a awm tih a sawi a, "A bikin mipuite'n zirna leh hriatna lama hma kan sawn zel a ṭul a, vantlang hriselna kawngah pawh hmasawnna tur kan la ngah hle. Hma kan sawn zel theihna kawngte hi nasa taka lo ûmzui a, lo bei zel turin ka ngen che u a ni," a ti.

Serchhip MJA president Kapliana Pachuau chuan Kumar Abhishek chu hriatrengna thilpek a hlàn a; a theihna zawng zawnga Serchhip district tana thawktu, hruaitu ṭha tak nia a hriat thu sawiin, "A hmalakna azara corporate social responsibility fund tam tak kan hmu ringawt pawh hi nakin thlenga hriatreng tlak a ni," a ti a; a hnathawh zelna turah duhsakna a hlân a ni.