Leiba tipung loa SEDP sem thuai turin phût
Mizoram Pradesh Youth Congress Committee (MPYCC) chuan, MNF sorkar chu kum 2018 inthlan dawna an intiam ang ngeiin, leibá tipung loa Mizorama sorkar hnathawk lo chhungkaw tinte hnenah Socio Economic Development Programme (SEDP) hnuaia Rs 3,00,000 sem ngei turin an phût.
MPYCC chuan thuchhuah siamin, MNF party-in sorkarna an chelh aṭanga kum thumah pawh an intiam SEDP an la sem lo tih an tarlang a, "Nimin maia MNF MLA inhmukhawmte'n SEDP sem chungchang an sawi hi mipuia an intiam a nih angin, a taka hmuh tur a awm ngei kan phût tlat a ni," an ti.
Congress party pawhin sorkarna a chelh laiin an intiam angin NLUP a sem tih sawiin MPYCC chuan, "Congress sorkar laia mipui hnena NLUP ṭanpuina sem a nih khan Mizoram sorkar sum bat pakhat mahin a tipung lo a, sorkar leiba nasa taka tihhniam zawk a ni," an ti a; MNF sorkar chu SEDP an sem avanga Mizoram leibá tipung lo turin an chah.
MPYCC chuan, dan kalha Myanmar aṭanga kuhva lak luh chungchanga boruak lian tak a awm laia Champhai DC Maria CT Zuali sawn chhuahna thupek January 13, 2022-a tihchhuah a ni chu ngaihṭhat thlak loh an tih thu an tarlang a, "Dan kalha sumdawngte laka khawng taka ro a rel lai meka Pi Maria CT Zuali transfer a ni thut hi dikna rahbehna a ni thei kan ti a, dan leh thupek kengkawh ṭhatu Pi Maria-i kan chhuang hle a ni," an ti.
Mizoram leh Assam ramri buainaa mi ṭangkai leh national highway zauhna tura zangnadawmna chungchanga dikna nena hma la ṭhin Kolasib DC Dr H Lalthlangliana transfer a ni pawh dikna phûm bo tumna a nih an hlauh thu an tarlang.
Congress ṭhalaite chuan, thingtlang lamah Covid-19 a lên nasat avangin eizawnnaah an buai phah nasa tih sawiin, a rang lama ṭanpuina pe turin sorkar an phût a, "Aizawl khawpuiah pawh Covid-19 denchhena eizawnna tihtawpsak mek tam tak hi sorkar hian ngaihtuah rawh se. India hmarchhak state ṭhenawmte'n SOP her rema mipui eizawnna khawih buai lo zawnga hma an lak laia Mizorama kan inkhap bur ṭhinte hi mipui dinhmun ngaihsak loh leh hriatthiam tâwk loh vang a ni," an ti.