Governor-in kawng siamtute a kâwm
Governor Hari Babu Kambhampati chuan nimin khan Raj Bhavan-ah National Highways and Infrastructure Development Corporation Limited (NHIDCL) hnuaia Lunglei leh Tlabung inkar kawngpui siam hna thawktu contractor SRK Constructions and Projects Pvt.Ltd, Hyderabad hotute a kâwm a; chak zawka hna thawh dan tur leh kawngpui siam zawh hma dan tur a sawipui.
Hari Babu Kambhampati chuan, Lunglei thlang lama chêng mipui tan Lunglei-Tlabung inkar kawngpui a pawimawh hle tih sawiin, "Kawngpui hi siam zawh a nih hunah chuan hun rei tak chhung Lunglei thlang lama chengte'n kawngpui chhia vanga harsatna an tawh ṭhinte sutkian a ni dawn a ni," a ti.
Larsap chuan, "Tlabung leh Chittagong, Bangladesh a inthlunzawm theih hunah phei chuan Mizoram tan sumdawnna kawngpui pawimawh leh hmasawnna thlentu tur a ni dawn," a ti a; kawng siamtute chu harsatna an neihte a ṭul anga hmalakpui a tum thu leh kawngpui siam hna thawh a nih chhungin khawtual mite hna thawh tur siamsak a, sum an thawh chhuah dan turte ruahmanpui turin a chah a ni.
SRK Constructions and Projects managing director S Lallit Sanjeeva Reddy chuan, kawngpui awm mek km. 95 aṭangin km. 75-a thui turin Lunglei leh Tlabung inkar kawng siam tum a nih thu a sawi a; kawngpui zau zawk leh ṭha zawk siam tumin theihtawp an chhuah thu te, kawngpui dunga a chhe lai deuh aṭangin hma an lak mek thu leh, hna a sâwt zawk nan sorkar leh mipui thlàwpna an mamawh thu a sawi bawk.