January thlaah hripui vei mi 8,873 hmuh chhuah a ni tawh

January 13, Ningani khan Mizoramah Covid-19 vei mi 1,046 hmuh chhuah a ni a, January thla chhungin mi 8,873 hmuh a ni tawh. Nimin khan hripui vei dam tawh mi 373 chhuahtir an ni a, Covid-19 vangin mi pakhat a thi.

Covid-19 vei hmuh tharte chu mipa 479 leh hmeichhia 567 an ni a; ZMC laboratory-a hmuh 97, TrueNAT hmanga hmuh 41, RAT hmanga hmuh 893 leh FIA hmanga hmuh 15 niin, positivity rate chu 14.36% a ni. Mi 1,046 zinga 731-in symptom an nei.

Sample endikna district 11 zingah positivity percentage 10% aia a sànna district pariat a awm a, a sànna ber Khawzawl district-ah 100% niin, a záwnin ni li chhung sample endik zawng zawng an positive tawh a, January 10-ah 375, January 11-ah 116, January 12-ah 180 leh January 13-ah 124 niin, an vaiin mi 795-te an positive vek a ni.

IPR tarlan danin, hripui vei mi 20 aia tam hmuhna khua a awm leh nual a; Sekhumah mi 63, Bualpui V-ah 46, Rabungah 34, Mualphengah 31 leh Sazêpah 23 hmuh niin, symptom nei vek an ni. East Lungdarah mi 108 hmuh niin, an zinga 93-in symptom an nei a; Hmunṭhaa mi 21 leh Bungtlanga mi 20 hmuh thar zinga a tam zawkin symptom an nei bawk.

Nimin tlai dar 5 thleng khan hripui vei dam tawh mi 373 chhuahtir an ni a; district tina chhuak zat chu - Aizawlah 141, Serchhipah 85, Mamitah 47, Champhaiah 31, Lungleiah 23, Saitualah 17, Khawzawlah 14, Lawngtlaiah 10, Kolasib-ah pali leh Hnahthialah pakhat a ni.

IDSP record angin, Mizoramah Covid-19 vei 1,50,538 hmuh chhuah a ni tawh a, mipa 72,231 leh hmeichhia 78,307 an ni. Nimin tlai dar 5 thleng khan mi 1,42,287 (94.54%) chhuahtir an ni tawh a, mi 566 (0.38%) thi tawhin, enkawl mek mi 7,685 (5.10%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,50,538 chu mi 1,000 zelah hripui vei mi 137 an awm ang a ni a; mi 1,00,000 zela Covid-19 vangin mi 51 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 11, 2021 thlenga swab sample endik tawh 15,67,900 aṭanga RT-PCR hmanga endik zat percentage chu 21.26 a ni a, RAT hmanga endik zat chu 72.96% a tling.