Sorkarin kuthnathawktute a ngai pawimawh - Chief Minister

Chief minister Lal Thanhawla chuan, nimin khan Serchhip leh Thenzawl inkara Mat lui Chawmkaia lei (bailey bridge) dawh tur lungphûm a phúm a; thu sawiin, Mizoram sorkarin kut hnathawktute a ngaih pawimawh thu a sawi.

CM Lal Thanhawla chuan, Mat lei dawh tur chu kut hnathawktute an eizawnna kawnga chhâwk zângkhaitu a nih tur thu sawiin, "Mat ruam hi buh leh bâl leh thlai dang thar chhuahna hmun pawimawh a nih avangin he lei hi dawh zawh a nih chuan mipuite tan agriculture leh economy hmasawnna hmanraw ṭangkai tak a ni ang. Kut hnathawktute sorkarin a ngai pawimawh a, a theihna apiangah remchanna a siamsak ṭhin," a ti.

Ramin a mamawh ang zelin sorkarin policy a siam ṭhin tih sawiin Lal Thanhawla chuan, "Rambuai laiin remna chu mipui mamawh ber a nih avangin remna leh muanna a thlen theih nan hmalak a ni a, chumi hnuah mipui retheihna khur aṭanga khai chhuak tura hmalak leh niin, kut hnathawktu leh eizawnna ngêlnghet nei lote tan NLUP hmanga hmalak a ni," a ti a; NLUP pui turin NEDP an duan leh thu a sawi.

Chief Minister chuan, ram hmasawn leh intodelh ni tura hmalakna hna kalpui mekte sawiin, "Kawlphethaa intodelh theih nan hydel project bakah, ni zung chakna hmanga kawlphetha siam chhuahna Solar Energy Plant hmun eng emaw zatah bun a ni. Sorkar hnaa innghat ringawt loa eizawnna ṭha dang tam tak ṭhalaite'n an neih theih nan Entrepreneurship Development Scheme duan a ni," a ti.

Lungphûm inkhawm kaihruaitu PWD engineer-in-chief R Vanlaltluanga chuan, Chawmkaiah hian mi 300 chuangin an eizawn hmuna kalna atan ni tin suspension bridge an kân ṭhin thu sawiin, "Fûr leh ṭhála hman kawp theih tur bailey bridge-a thlak thuai a ni tur hi a lawmawm hle," a ti a; lei dawh thar tur chu kut hnathawktute eizawnna puitu dik tak a nih dawn thu a sawi.

PWD superintending engineer Vanlal­chhuana tarlan danin, lei hi ft. 180-a thui, ft. 9.10-a zaua dawh tur a ni. A dâwl zawh chin chu 24R IRC Loading Class niin, a lei chhuat (deck level) chu 381.467 metre (above sea level)-ah dawh a ni dawn a, chu chu fûra tui chîm san lai ber aiin metre 2-a sang a ni.

Lei dawhna turin NEDP aṭangin cheng nuai 571 ruahman niin, a thawk tur online-in quotation koh mek a ni a; thla 18 chhunga dawh zawh tura tih a ni.