Nurse-te'n Aizawlah kawng an zawh
Trained Nurses Association of India (TNAI) bultumin nimin khan India rama state hrang hrangah nurse-te'n kawngzawh, Nurses Central Rally huaihawt a ni a; Aizawlah pawh TNAI Mizoram State Branch huaihawtin kawng an zawh.
Kawngzawh hi Mizo High School Indoor Hall kawt aṭanga ṭanin, Lal Thanhawla Auditorium thleng an kal a, nurse leh nursing zirlai 1,100 vel an tel.
Kawng zawhtute hi au rual loin an kal a, an thil duh leh phut chi hrang hrang ziahna an keng lang thung. Kawngzawh tàwpna, Lal Thanhawla Auditorium-ah inkhawm tawi an buatsaih.
Nurse-te kawngzawh ṭannah hian TNAI Mizoram president Lalremmawii'n thu a sawi a; Lal Thanhawla Auditorium-a a khârna inkhawmah Mizoram College of Nursing principal Lalchhanhimi'n thu a sawi a, TNAI Mizoram secretary Lalrinhlui kaihhruaiin resolution pass a ni.
Kawngzawh chhan leh resolution
1) Hlawh chungchangah, sorkar laipui hnuaia nurse-te hlawh ang leh hamṭhatna dang (allowance) dawn ang state hrang hrang sorkar hnuaia nurse-te hlawhtir leh dawntir ve.
2) Mizoram sorkara nurse leh post dang ṭhenkhata post ruak eng emaw zat awm - staff nurse post 107, ward superintendent (sister) 40, public health nurse 11, tutor post 2, principal (MCON) 1, health worker 116, health supervisor 106 leh community health officer 20-te hnawhkhah.
3) Indian Nursing Council (INC)-in a duan angin, nurse pakhartin damlo a enkawl zat tur bithliah anga kal. (INC Norms-ah ward pangngaiah staff nurse pakhatin damlo pathum leh ward superintendent-in damlo 25 an enkawl tur a ni a; ICU leh cardiology-ah staff nurse pakhatin damlo pakhat, casualty/emergency-ah nurse pahnihin damlo pathum, operation theatre-ah nurse pathumin damlo pakhat leh OPD-ah nurse pakhatin damlo 100 an enkawl tur a ni.)
4) Sorkara a ngheta thawk ni lo, contract-a nurse lâk leh thawhtir leh nurse outsourcing tihtawp.
5) January 29, 2016-a Supreme Court thupek anga private hospital/clinic-a thawk nurse-te a tlem berah thla khatah Rs. 20,000 hlawhtir; nurse-te hna thawh hun chhung mumal zawka siamsak, leave neihtir ve, medical facility, transportation, accommodation, etc. pek.