NRC kan ngai pawimawh dawn - Duhoma

Zoram Peoples' Move­ment (ZPM) chief minis­terial candidate Lal­duhoma chuan, August 22, Nilaini khan Khuanglenga vantlang inkhawmah thu sawiin, ZPM a sorkar veleh Assam National Register of Citizens (NRC) chu an ngaih pawi­mawh hmasak zinga mi a nih tur thu a sawi.

Lalduhoma chuan, Assam sorkarin NRC draft list vanga ram dang mi (foreigner) Mizorama luh rûk tum ven kawngah Mizoram sorkar chu a muhil der niin a sawi a, "Muhil tak tak hi kaih­thawh an awlsam a, muhil der chu kaihthawh an har. MZP hmalakna hi a fakawm a, ZPM a sorkar veleh NRC chu ngaih pawimawh hmasasakte zingah dah a ni ang,” a ti.

Mizoram hmun hrang hranga kut hna thawka eizawngte’n ZPM sorkar hun an nghakhlel tawh tak zet nia sawiin Duhoma chuan, "Zoram mipuite’n ZPM-ah chauh beiseina an nei tawh. Kum 30 chuang sorkarna lo chelh tawhtu party pahnih MNF leh Congress party-te'n kut hnathawktute tana an tih duh loh - thlai thar leina budget-a dah chu kan ti ngei dawn a ni," a ti a; Mizo mipuite chu anmahni in vote chhuak turin a sáwm.

Lalduhoma chuan, Mizo ṭhalaite tan khawvel thar siam turin ZPM-in 'Bána kaih’ (hand-holding policy) a neih thu sawiin, "Hand-holding policy hi kan ṭhalaite’n hre chiang se kan duh a; sem policy, chaw dangral ûma awm mai mai lo turin ka chah duh. Keini chuan Bible zir­tirna angin, a thlawna dawn ni loin, thawhrimna aṭanga dinchhuah kan in­zirtir tlat dawn a ni," a ti.

ZPM CM Candidate hian East Tuipui bial chhunga khaw hrang hrang a fang a, East Tui­pui bial viltu C Lalṭanpuia'n a ṭawiawm a ni.