Zu vangin mi 700 chuang an thi tawh - Zoramthanga

Serchhip MNF East Block-in nimin khan Serchhip Chhimvenga Lalpuithanga Hall-ah Political Training cum Workers Meet an buatsaih a, MNF president Zoramthanga'n thu sawiin, zu vangin Mizoramah mi 700 chuang an thi tawh a, police zingah zu vanga thi mi 500-600 vel an awm niin a sawi.

Zoramthanga chuan, Congress sorkarin kohhran duh loh zu an zuar nia sawiin, "Chutah, elhsen taka ṭawngkam an hman zui hnuah Congress chuan Mizoram an phingchil mek. Zu vang hian Mizoram pumah mi 700 chuang an thi tawh a, police zingah rál kuta thi an awm loh laiin zu vangin mi 500-600 vel an thi tawh a ni," a ti.

MNF President chuan, MNF sorkar laia district pathum an puan tawhte chu tun thlengin Congress sorkarin a tipuitling duh lo tih a sawi a, "MNF kan sorkar chuan heng district pathum kan puan tawh - Saitual, Khawzawl leh Hnahthial-te hi kan tihlawhtling dawn a ni," a ti.

Serchhip bial chu Lal Thanhawla’n kum rei tak a enkawl tawh tih sawiin Zorama chuan, "Keiin kum 10 chhung Champhai ka enkawl nen hian khaikhin u la, bial mipuite'n a dinhmun chu inhre­thiam mai awm e," a ti a; zu zawrhnaa a bulpui ber titawp turin Serchhip mipuiin Lal Thanhawla an thlan tlin tawh loh a pawimawh niin a sawi.

Zoramthanga chuan, Tuirial Hydel Project hlawhchham chhana Congress-te'n MNF an puh ṭhin tih sawiin, "MNF sorkar laia he hydel project tiṭhuanawptu chu amah Pu Lal Thanhawla ngei hi a ni a, sorkar laipuiin sanction min pek a tum tawh chu MNF hmingṭhatna tur nia a ngaih avangin sorkar laipui, kha tih laia Congress sorkar hnenah lehkha thehlutin a sûttir leh a ni," a ti.