KHAWTHLIR
Chawngzuala a thi
MLA hlui Chawngzuala (78) s/o Upa Chawngzika (L), Mission Veng chu nimin tlai dar 5 vel khan an inah a thi a; nizan khan lumen niin, vawiin chhun dar 12-ah vui a ni ang. Chawngzuala hi Mizoram state a nih hnua Assembly inthlanpui hmasa ber, kum 1987-a inthlanah Aizawl South-II bial aṭangin independent (MNF) candidate niin thlan tlin a ni a; State Planning Board-ah vice chairman a nih tawh bakah, September 1, 1992 aṭanga January 25, 1994 MIFCO-ah chairman a lo ni tawh a ni.
La thehlut lo
Mizoram sorkar chuan Gauhati High Court, Aizawl Bench-in NLUP dawng tur thlan danah guidelines (inkaihhruaina) siam a nih leh nih loh sawifiah tura a hriattir chungchangah chhànna a la thehlut lo. Thu dawn danin, Mizoram sorkar aṭanga a chhanna tur an la dawn loh avangin, chhanna hi sorkar ukilte chuan an la thehlut thei lo. Tarlan tawh angin, High Court hian August 3, 2018 khan NLUP sem kal mek chu chawlhkar li chhung atan a stay a, sorkar chu chawlhkar li chhunga insawifiahna thehlut turin a hriattir a ni.
Thisen pe
Republic Vengthlang Branch KṬP chuan nimin khan an Kohhran Hall-ah blood donation camp an huaihawt a, an member mipa 21 leh hmeichhia pahnihte'n Aizawl Civil Hospital tan thisen unit 23 an pe.
TT inelna
Indian Audit & Accounts Department (IA&AD) hnuaia NE Zone Table Tennis Tournament chu Mizoram TT Association Hall, Mission Vengah August 21-23 chhung khan neih a ni a, Accountant General (AG) Office, Mizoramin a thleng. Inelnaah hian Arunachal Pradesh leh Sikkim tih loh state dang zawngin team an tir a; Mizoram AG chu hmeichhiaah champion leh pahnihna an ni a, mipaah pahnihna an ni bawk.