Sorkar loh hlauhna ka nei tawh lo - Dr R Lalthangliana

MNF vice president Dr R Lalthangliana chuan East Tuipui North Block MNF-in nimina Sesih community hall-a SEDP cum Political Training an buatsaihah thu sawiin, sorkar hmasain development a pàmṭùlte chu MNF sorkar hunah an tihpuitlin vek dawn thu a sawi a, "Sorkar loh hlauhna ka nei tawh lo," a ti.

Dr R Lalthangliana chuan, MNF sorkar laiin a hmaaa Congress sorkarin district headquarters panga a puante chu an tipuitling vek tih sawiin, "Sorkar hmasa thil tihte kan hlamzuihtir ve mai mai lo. Kan sorkar laia kawng kan laih Congress sor­karin a enkawl chhunzawm duh loh te, zirna lama kan hmalakna hrang hrang a tihhlamzuih te, development hrang hrang châwl ṭhuap tawhte hi tihpuitlin vek a ni dawn a, hengte hi kan SEDP-ah a chuang sa vek a ni," a ti.

R Lalthangliana chuan, Congress sorkarin NLUP a sem vânglai leh zu zawrh vanga an la hmingchhiat tak tak hma, kum 2014-a Lok Sabha in­thlanah MNF candidate Robert Romawia Royte chu Chakma area tel tih lo Assembly bial 39-ah Congress candidate aiin vote 5,000 velin a chak zawk tih sawiin, "MNF kan chhiatna ber Chakma area an chhiar a, vote 8,000 vel zetin kan hneh ta lo a ni," a ti a; a pumpuia MNF chak lohna chu vote 3,000 vel chauh a nih thu a sawi.

Kumina CADC inthlanah MNF-in seat pariat lain, a la tam ber an ni thei tih a sawi a, "MP inthlana kan chhiatna berah pawh Congress aiin kan sang tawh a, ram pum ngaihtuahin MNF-in sorkar theihna chance kan nei sang hle a, kan rin aia tam daih, bial 40-ah hian seat 40 dáwn pawh kan la thei a ni," a ti.