Khawsik leh khuh damdawi leitute Hming leh nihna chhinchhiah turin ngen
Health Services directorate hnuaia Food & Drugs Administration chuan thuchhuah siamin, khawsik damdawi leh hritlang áwmná/khuh damdawi lei tum, doctor lehkha (prescription) nei lote chu damdawi an leitir pahin an hming, kum leh contact number la zel turin damdawi zuarte an chah.
Food & Drugs Administration (FDA) chuan, Covid-19 hri léngin khawvel ram tinah buaina leh manganna a thlen mek tih sawiin, Mizoram mipui pawhin an buai phah hle a, invènna nasa zawka kaipui zel a ṭul thu an tarlang a, "Covid-19 hri léng hi kai nachhan rinhlelh tur nei lo tan pawh kai palh theih a ni a, chu'ng mite chuan khawsik, áwmná leh khuh vanga awm nuam lo an neihin, ngaihṭhat lohna nei chuang loin an mamawh damdawi an lam ve mai thei reng a ni," an ti.
FDA chuan, "Khawsik damdawi, hritlang áwmná leh khuh damdawi lei tura lo kal, doctor prescription nei lote chu damdawi kan leitir pahin an hming, kum leh contact number lo lak zel ni se. Mizorama damdawi zuar zawng zawngte hemi kawnga thawhpui turin FDA chuan a sawm tak meuh a ni," an ti a; thawhhona ṭha kaltlangin hri léng darh zel tur vèn theih a nih thu an tarlang. Khawsik, hritlang áwmná leh khuh damdawite doctor lehkha tel loa leite hming, kum leh contact number chhinchhiahte chu ni tin tlai dar 5-6 inkarah phone number 9436152192 / 7005084957 / 9436196515-ahte Whatsapp hmanga thawn turin FDA chuan damdawi zuarte an ngen a ni.