Rabung-ah power sub station hawn a ni

Power & Electricity minister R Lalzirliana chuan nimin khan Rabung khuaa power control room-ah 33 KV Sub-Station a hawng.

R Lalzirliana chuan, Rabung khua chu BPL awm lohna khua an nih avang­in fakawm a tih thu a sawi a, "He khua hi a lo ṭhan zelna tur leh hnam dangte'n an nêk ral lohna tur te, hma a sawn theih nana ralthuam ṭha ber chu ṭhalaite leh zirlaite lehkhathiamna leh thil hrang hranga ṭan lak a ni. A bik takin ṭhalaite central service lamah ṭan la turin ka duh a che u," a ti.

Bialtu MLA TT Zothansanga pawhin thu sawiin, Rabung aṭanga khaw hrang hrang intlawhpawhna atana kawng siam hna thawh mek a nih thu a sawi.

33 KV Sub Station hawn inkhawm hi P&E secretary H Lalengmawia'n a kaihruai a, P&E chief engineer Lalramliana'n sub-station bun a nih dan a sawifiah a ni.