OST-a thawkte tan training buatsaih

Mizoram State AIDS Control Society (MSACS) chuan nimin khan NLUP Conference Hall-ah Mizorama Oral Substitution Treatment (OST)-a thawktute tan ni hnih awh tur training a buatsaih ṭan a; MSACS project director Dr Lalmalsawmi Sailo-in a hawng.

Dr Lalmalsawmi Sailo chuan, Mizorama ruihhlo hluar zel vanga harsatna hrang hrang lo pung zel chu lungchhiatthlak leh zahthlak tak a nih thu a sawi a, "Kristian rama thleng lo tawp tura ngaih hi kan rama a lo thleng ta zel a, a vanduaithlak tak zet a ni," a ti.

MSACS Project Director chuan, ruihhlo hmanga inchiu ṭhinte'n inchiu bànsana nunphung pangngai a zawh leh theih nana enkawlna MSACS-in a kalpui OST Centre chu district tinah a awm thu a sawi a; OST centre-te chu a mamawhtute'n an chhawr ṭangkai theih nan nasa zawka ṭang mar turin thawktute a chah.

Training-ah hian district hrang hranga OST centre 17-a thawktu nurse leh DEO-te bakah, Aizawl, Champhai leh Kolasib district-a District AIDS Control & Prevention Unit (DAPCU)-a DPM leh Link Worker Scheme (LWS)-a DRP-te an tel.

OST centre-ah hian ruihhloa inchiu ṭhin, nghei mai thei tawh lote chu damdawi chi khat, Buprenorphine hmangin a thlawna enkawl ṭhin a ni a; ni tin centre-ah kalin, mahni ngeiin thawktute hmuh lai ngeiin an lei hnuaiah damdawi dahin, a ral hma loh chu an hmuam ṭhin a ni. Damdawia enkawl mai bakah hian, counselor-te'n ruihhlo an nghei theih nan counseling an neihpui ṭhin bawk.