PRISM-in kawngpui ṭha an tiam

PRISM party chuan August 22, Nilaini khan Aizawla hmun hrang hrangah Street Campaign an buatsaih a, an president Vanlalruata chuan, PRISM an sorkar chuan kawngpui ṭha an tiam tih sawiin, "Road maintenance kan outsource ang a, neitu thinlung púa khawtlang leh a hmangtute'n an enkawl tawh dawn avangin kan kawngpuite hi a ṭha tawh dawn a ni," a ti.

Vanlalruata chuan, "Kawngpui ṭha tel lo chuan hmasawn theih a ni lo a, kawngpui ṭhat leh ṭhat loh hi hmasawn leh hmasawn loh tehna tling a ni. Kan kawngpui a chhe tial tial a, hman lawka darkar 5 chhunga kan tlan thlen theih kha tunah chuan darkar 8-te tlân a ngai ta," a ti a; kawngpui dinhmunin hma a sawn lo a, a hnungtawlh zawk tih a sawi.

PRISM party hian Street Campaign hi Kulikawn, Mission Veng­thlang, Nursery, Bungkawn, Govt. Complex, Ramrikawn, Chawlhhmun, Zonuam leh Chhangur­kawnahte an nei a ni.