Vawiinah Bru-te hruaikir tum a ni

Tripura refugee camp-a Bru-te chu vawiin hian Mizoramah hruaikir tum an ni dawn. Mizoram sorkar chuan hruaikir hna thawk tura a tih tur angte a tifel tawh nia thudawn a ni.

Home dept. hotute hnen aṭanga thudawn danin, Bru-te hruaikirna atana lirthei hman turte pawh refugee camp-ah tirh an ni vek tawh a, official-te pawhin camp hi an pan tawh a ni. Vawiinah kir duh an awm lo a nih pawhin, ni hnih ni thum chhung chu kir duh an awm takin camp-ah hian an awm chilh hrih ang.

Tun dinhmunah Tripura refugee camp paruk - Kaskau, Khakchangpara, Hamsapara, Asapara, Naisingpara leh Hazacherra-ah Bru chhungkaw 5,407 (voters 10,052) an awm mek a ni. Bru rawn kir duhte chu Mamit district-ah khaw 48, Lunglei district-a khaw pali leh Kolasib district-a khaw 10 ah dah tum an ni.

Hetihlai hian Mizoram sorkar official-te'n tun hnaia Bru-te Mizorama an kir duh leh duh loh an zawhnaah chhungkaw 423-a mi 2,753-te chauhin kir an duh thu an sawi a ni. Kir duhte chu Kaskau aṭangin chhungkaw 415, Khakchangpara aṭangin chhungkaw paruk leh Hamsapara aṭangin chhungkaw pahnih an ni.

Mizorama lêt Bru chhungkuate hian sorkar laipui aṭangin in sak ṭanpuina Rs. 1,30,000 leh suma puihna (financial assistance) kum tin Rs. 5,000 kum hnih chhung an dawng dawn a; ration buhfai a thlawnin kum hnih chhung an dawng bawk dawn a ni.

Bru lo kirte tan hian an awmna tur village council-te chuan in hmun leh huan thlai an siamna tur ram an pe dawn a, sorkar ṭanpuina hrang hrang, job card leh ration card-te siamsak an nih dawn bakah, sorkar ṭanpuina an dawn theihna turin a theih ang anga NLUP pawh ngaihtuahsak tum a ni.

Hetihlai hian refugee camp-a Bru-te chu an thil dawn turah hian an lungawi lo a, hruaikir hna thawhna atana Ministry of Home Affairs, Mizoram sorkar, Tripura sorkar leh Mizoram Bru Displaced People (Forum)-te'n draft agreement an siam aṭangin MBDPF president A Sawibung chu a inhnukdawk a ni.

Draft Agreement-a lungawi lote chuan Mizorama an lêt huna an awmna tur hmun ruatah chhungkaw 500 vel a huhoa awm te, anmahni vengtu tur para military force dah te, an eizawnna tur ram chhungkaw pakhat tan hectare 5 ṭheuh pek te, anmahni chhawmdawlna tura chhungkaw tin tan Rs. 4,00,000 pek tur chu kum thum hnua pek chhuah tura ti loa bank-a pawisa dah luh dan pangngaia dah te, Bru culture leh sakhuate humhim a nih a, ei leh bara hma an sawn theih nan Development Council dinte an phût a ni.

Hetihlai hian draft agreement aṭangin MBDPF President inhnukdawk mah se, Mizorama Bru hruaikir hna hi draft agreement anga kalpui tho tum a ni. MHA chuan Bru-te hi kir duh lo mah se, October 1 aṭang chuan refugee camp hi khar a nih tur thu an lo sawi tawh a ni.

Draft Agreement tlangpui
• Chhungkaw tin hnenah Rs. 4,00,000 pek tur.
• Cash assistance kum hnih chhung thla tin Rs. 5,000 (kum hnih chhungin Rs. 1,20,000) pek.
• In sakna tur (house building assistance) Rs. 1,50,000 ṭheuh pek.
• Kum hnih chhung a thlawnin ration pek.
• Tripura aṭanga Mizorama an lêtna senso (transportation) Mizoram sorkarin a tum ang.
• Bru-te dahna khuaah kum thum chhung anmahni vengtu tur special police officer pali ṭheuh dah.
• Mizoram mi dangte ang bawkin an lo tur ram pek.
• In an sakna tur ram ft. 40-a sei, ft. 30-a zau pek.
• NLUP ṭanpuina pek.
• An awmna khuaah Eklavya Tribal Residential School hawn.
• Permanent residential certificate leh tribal certificate pek.
• Special Development Project siamsak.
• Bank account hawnsak.
• Aadhaar card leh ration card siamsak.
• Mizorama lâk lêt tura enfiah tawh chhungkaw 5,407-a mi 32,876-te bakah, mi dangte enfiah nawn.
• Camp paruka awmte'n inthlannaa vote an thlak theih nan August 31, 2018 ral hmaa Electoral Roll ennawn.