An thil phut a hlawhtlin theihna atan Sipai bangte pen chhuah an tum

Mizoram Ex-Services League (MESL) hruaitute chuan nimin khan an president John Zama hoin Aizawl Press Club-ah thuthar thehdarhtute an kawm a, Mizoram sorkarin an thil phutte a tihlawhtling duh lo niin an sawi a, "A ṭul anga hma la turin kan pen chhuak dawn," an ti. August 28, 2018 hian Aizawl bakah Mizoram hmun dangahte an thil phut tihhlawhtlin phutna atan kawng zawh an tum.

MESL hruaitute chuan an thil phutte a hlawhtlin beiseia an nghah fan fan laiin, sorkarin a aia chhe zawk dinhmuna a dah thu sawiin, "Kan chanvote min chhuhsaktu, kan hamṭhatna tur ngaihsak lo leh ngai pawimawh lotu sorkar lakah kan lungawi lohna chu kan lantir a hun ve tawh kan ti," an ti a, an thil phutte chu an ṭanghma hai nana phuahchawp ni loin, sorkar laipuiin ex-servicemen-te tana state sorkarin a tihhlawhtlin tura a tihte a nih thu an sawi.

An lungawi lohnate vawi duai lo sorkarah an hriattir hnuah pawh ngaihsak an hlawh lo tih sawiin MESL hruaitute chuan, "Ex-servicemen-te la tih ngai loh angin kawng kan zawh tawh hial a ni. Mahse, tun thleng hian kan lungawi lohnate leh kan thil phutte kan sorkar chuan min la tihhlawhtlinsak lo fo hi thil lungchhiat thlak tak a tling a ni. Ex-ervicemen lo awm zel turte tan, sipai takin, kan chungah eng pawh thleng se, a ṭul anga hma la turin kan pen chhuak dawn," an ti.

MESL-te lungawi lohna :
1. India rama sorkar hna reng rengah, kum 60 thleng service theih niin, chumi zawhah full pension-in sorkarin a chawlh tir ṭhin a ni. Sipaiah chuan a tlangpuiin kum 35-45 inkar an nih laiin an duh emaw duh lo emaw, service rules angin pension tlem pein chawlhtir an ni ṭhin. Hei hi hre rengin sorkar laipui chuan kum 1979 khan thuchhuah a siam a, sorkar hna group C ah 10% leh D ah 20% ex-servicemen tan reservation siamsak turin a ti tawh a, hei hi Mizoramah chuan hman a ni ve lo.
2. Ex-servicemen-te hi service rei lote hnuah chawlin, service laia hamṭhatna tam tak an dawn ṭhinte chu vawilehkhatah a tawp ṭhin. Hei vang hian sorkar laipui chuan state sorkarte hnenah ex-servicemen tan property tax exemption siam sak turin a ti a, mahse Mizoram sorkar chuan ex-servicemen-te a awl ve lo.
3. World War II Veteran leh hmeithaite lawmman chu sorkar laipuiin a tlem berah Rs. 6,000 nise a ti a ni. MESL chuan hemi chungchangah hian Governor leh Chief Minister-te ṭawngkaa an biaknaah Rs. 6,000 tling si loa tipung tur anga an sawi hnuah pawh hmalakna a awm chuang lo. 2nd Assam Regiment Disband-te pawh sorkarin kum 2017-ah an lawmman tihpun tiam mah se, tun thlengin tihpun a la ni lo.
4. March 20, 2018 Assembly Session-ah Home Minister-in Home Guard-a Director General post chu MPS-te'n secretary level post an neih ve theihna tur atana siam a nih dawn thu a puang a ni. Central leh state guideline-te, Mizoram Home Guard leh Mizo ex-servicemen-te inkungkaihna ngaihsak hauh loa Mizoram sorkarin MPS tana Director General post siamna emergency awm hauh lo chungin, emergency power hmangin a pass a ni.