CYMA-in NRC siam ve an duh

Central Young Mizo Association (CYMA) office bearer-te chuan nimin khan governor Kummanam Rajasekharan chu Raj Bhavan-ah an kawm a, Assam sorkar anga National Register of Citizens (NRC) siam ve an duh thu an thlen.

CYMA hruaitute chuan an pawl inrelbawl dan leh khawtlang tana an hnathawhte sawiin, "Tunhnaiah Mizo ṭhalaite zingah ruihhlo hmang sual an pung a ni. Ṭhalaite ruihhloa an fihlim theihna atan an puala skill development buatsaih a, chu chuan an hun awl te luahkhatin an hun ṭha te ṭangkai zawka an hman theih a beisei awm," an ti.

Ruihhlo do kawnga hmalakna hrang hrang an neih te chu sawiin CYMA hruaitute chuan, "Tunhnaiah Chief Minister zahawm tak kaih­hruaina hnuaiah Ruihhlo Do Core Committee din a ni. Sorkar laipui pawh ruihhlo do kawngah hian inrawlh se kan duh a ni," a ti a, Myanmar sorkar pawh ruihhlo do kawnga thawhpui tura sawm ṭha an tih thu Governor an hrilh.

CYMA hruaitute chuan Nar­cotics Control Bureau hotute chu Mizoramah rawn zinin, ruihhlo tawlh chungchang rawn zirchiang se an duh sawiin, "Ruihhlo leh dan loa ram pawn aṭanga Mizoram rawn lut ru tur dang turin ramriah sipai tun aia tam zawk dah theih nise. Assam sorkarin National NRC a puanzar tak zulzuia siam ve ṭha kan ti," an ti.