Corruption do loin, kan khap ang - K Sapdanga

Zoram Peoples' Movement (ZPM) leader K Sapdanga chuan sorkarna an siam chuan corruption an do dawn loh thu sawiin, "Do loin kan khap ang," a ti.

Nimina an party pisa-a chhung inkhawmah thu sawiin ZPM Leader chuan corruption chu do vak a ngaih loh thu a sawi a, "Corruption do hi policy-a telh chi pawh a ni lo. Corruption hi sorkarna kan chan hunah kan do dawn lo a, corrupt hmanin mi kan siam lo ang. A chung lama mite an corrupt vangin an hnuaia mite an corrupt ngam ṭhin. Keini chuan corruption hi kan khap dawn a ni," a ti.

K Sapdanga chuan sorkarna an siam chuan contractor tu emaw phena biru an awm an phal dawn lo tih sawiin, "Contract hna reng rengah a thawktute phenah tu emaw an biru deuh vek, MLA leh minister-te pawh an tel. Contract hna in 50-50 kan phal dawn lo," a ti a, contractor phena biru an awm loh chuan hnathawh a letin a ṭhat tur thu a sawi.

An thil tum langsar zual sawiin ZPM Leader chuan, "ZPM sorkar kumkhatna aṭangin retheihna zualpui umbo kan tum. Chumi atan chuan kumkhuaa kan aupui thlai kan thar ang, chu chu kan hralh ang. Kum dangah pawh kan thar tawh ṭhin, a hralhna a awm lo a ni. Chumi atan chuan hmunphiah leh sawhthing-ah bul kan ṭan dawn. Hna­thawh tur a awm chuan ṭhangtharte hi kan thatchhe lo," a ti.

K Sapdanga chuan kumin inthlanpui kan hmachhawn mekah party mal sorkar chak tak a din ngei duhna mipui thin­lungah a lang ṭan tih sawiin, "Politics thlifim tlehna lam a lang mek, vanneihthlak takin chu thlifim chu a dawngtu kan ni tih kan inhriat ang tho in neutral-te'n min hmuh dan a ni," a ti a, ZPM chu party dangte'n an beih­rawn mek thu a sawi.