State Refferal Hospital atan Congress-in Building pakhat pawh an sa lo - R Tlanga

MNF vice president, Health minister hlui ni bawk R Tlanghmingthanga chuan nimin khan MIMERS a tlawh a, State Refferal Hospital (SRH) atan Congress sorkarin building pakhat pawh an sa ve lo niin a sawi.

R Tlanghmingthanga chuan SRH chu ar vulhna atan bak hman tlak loh angin Congress sorkarin an sawi ṭhin tih sawiin, "Infrastructure zawng zawng chhawmin MIMERS din a ni. Congress party hi inpuhchhiat hrim hrim thiamna lamah hian an champion chiang hle. An dawt sawi tunah hian a langchhuak leh vek tawh a, an la zak chuang reng reng lo a ni," a ti.

MNF Vice President chuan Congress sorkarin SRH atan building pakhat pawh an sak a hriat loh thu sawiin, "An lo sa ve mial a nih chuan khawi hi nge Congress-in an sak ve Mizo mipuite min hrilh kan phut a ni," a ti a, MNF hmalak fel vek tawh leh sak sa vek Congress sorkar chuan an luah luh thu a sawi.

Medical college atana hmalakna chu MNF bul ṭan a nih thu sawiin R Tlanghmingthanga chuan, "MNF hmalakna a nih vang nge Congress hian a bawhzui ṭha duh lo hle. Kum 2008 aṭanga sorkar si khan Medical Council of India-in medical college atana a recognise turin kum 2014-ah DPR an thehlut thei hram. Vawi thum an DPR siam hnawl a nih hnuah a vawi 4-na atana kum 2015, July 05-a an theh­luh chu an pawm ta hram a ni," a ti.

Congress-in Roman Catholic kutah MNF-in SRH hlan an tum nia an sawi chu thudik lo nia sawiin R Tlanga chuan, "India rama medical college ṭha ber pawl St John Medical College, Bangalore nen thawk hoin Mizoram sorkar sum senso tlemte sia medical mollege ṭha tak din tum a ni a. MoU pawh peih vek a ni hman a, MNF khan kan sign pui hman ta lo a ni," a ti a, Congress-in medical college an din dan chu a hautak thu a sawi.

Health Minister hlui sawi danin, SRH atana sorkar laipui aṭanga MNF sorkar laia an sum dawn leh hman chu cheng vbc. 40 a ni. He sum hmang hian hospital building, administrative building, laboratory building, OPD building, kitchen, laundry bakah staff quarter 224, Type I,II,III,IV & V te sak vek a ni. Heng bakah hian SRH atana hmanraw hman tur equipment, external electrification leh water distributor-te pawh siam zawh vek a ni.

MNF Vice President chuan Congress sorkarin Aizawl Civil Hospital a enkawl dan pawh a lungchhiatthlak hle tih sawiin, "Cheng vbc. 54 kan dah sa zinga sum hmahruai vbc. 10 vel chu dik lo takin an hmang nghal a, hei vang hian Civil Hospital, Aizawl tih changtlunna tura kan ruahman sa, motor 200 dahna tur te, doctor leh thawktu dang quarters block 100 zet sakna turte chu an ti ṭhuanawp ta vek," a ti.