Hmasawnna ngelnghet chungchang zirho
NEC leh Planning & Programme Implementation department ṭangkawp chuan nimin khan ATI Auditorium-ah 'Regional Workshop on Sustainable Development Goals (SDG)' an buatsaih a, Planning minister Lalsawta'n a hmanpui.
Lalsawta chuan SDG thil tum chu United Nations member ram zawng zawngin lungrual taka tihlawtling tura ṭan an lak a pawimawh thu sawiin, "Ram pum huap leh state mal anga hmalakna thuah pawh lungrual tak leh rilru thuhmun pu a ṭan lak a ngai. Kum zabi 18-na velah mumal taka India leh ramdang te an insumdawn tawn tawh laiin Mizoramah chuan development kawnga hmalakna chu hmanni lawk anga sawi theih a ni. Kawng tinrengah Mizoram chuan ṭan tlaiin hnufual mah se, hmasawn pawl tak a ni thei zel," a ti.
Planning Minister chuan SDG Vision 2030 pawh SDG tihlawhtlin anih theih nana mumal taka Mizoram mil zela duan bik pawh siam a nih tawh thu sawiin, "Tunhnaiah pawh sik leh saah khawvel a danglam nasa a, ruah tam lutuk leh khawlum zualte pawh ramdangah chauh hmuh a ni ta lo a; Mizoramah ngei pawh sik leh sa inthlak danglam nasa tak avangin harsatna tam tak a thleng der tawh a ni," a ti a, environment ti chhe si loa hmasawnna kawnga ke pen thiam dan ngaihtuah tlan chu sorkar leh mitin mawhphurhna a nih thu a sawi.
Workshop hawn inkhawm hi Planning secretary Dr. C Vanlalramsanga'n kaihruaiin, MZU vice chancellor prof. KRS Sambasiva Rao, ICFAI University vice chancellor Lt. Gen. AK Mishra leh UNDP state technical officer Supriya Khound-te pawhin thu an sawi.
Workshop-ah hian hmasawnna ngelnghet a thlen theihna tura SDG huanga thiltum leh inzirtirna te mithiamte hnen aṭangin ngaihthlak a ni a, sawihona hun, zawhna leh chhanna hun pawh buatsaih a ni.