Kulva Cultural Competition ṭan

Mizo Students' Union (MSU) buatsaih ni hnih awh tur Kulva Cultural Competition chu nimin khan Electric Veng YMA Hall-ah Tourism minister John Rotluangliana'n a hawng.

John Rotluangliana chuan Mizo culture vawn him kawngah mawh kan phur ṭheuh tih sawiin, "Culture kalsan chu hnam bo an ni. Khawi hmunah pawh awm ila, Mizo Culure vawnhim zel hi Mizo te tih makmawh a ni," a ti.

Zirna lamah Mizote kan ṭan nasat a ngaih thu sawiin John Rotluangliana chuan, hna pawh Mizoram chhung chauh ni lo, hmun dangahte pawh thawk hreh lo turin zirlaite a chah.

Kulva Cultural Competition-ah hian zirna-in hrang hrang paruk telin, intihsiakna tur atan - Buhzai, Cheraw, Solakia thlan a ni a, mimal in elna atan hmeichhe tan buhthlei leh mipa tan hlado chhamte hman a ni ang.