Lungleia CCTV dah tur hrilhfiah

Nimin khan Home addl. secretary Lalbiakzama chuan Lunglei SP pisa-ah Lunglei khawpuia Closed Circuit Television (CCTV) dah tur chung­chang thuthar thehdarhtute a hrilhfiah.

Lalbiakzama chuan Lunglei CCTV Project chu High Powered Committee (HPC) vice chairman S Lalding­liana hmalakna a nih thu sawiin, "NEDP kaltlangin cheng vbc. 1.45 ruahman a ni. He CCTV Project kaltlang hian Lunglei khawpui chhung venhimna hna leh Traffic Control System tihchangtlung a ni ang a, dan leh thupek kenkawh kawngah nasa takin hmasawnna a thlen dawn a ni," a ti.

Khawvel hmasawn zelah sualna hrang hrang lo pung chho mek lo do let a, chhui chhuak a, bei let tur chuan dan leh thupek kengkawhtute’n hmanraw thar leh ṭha an neih a pawimawh hle tih sawiin Lalbiakzama chuan, "Aizawl City Surveillance Project ang bawkin hlawhtling taka kalpui a nih ka beisei," a ti a, he CCTV Project hi Lunglei mipuite tan thil chhin­chhiah tlak leh hmasawnna mellung pawimawh tak a nih thu a sawi.

Lunglei CCTV Project hna hi kalpui thuai tur niin RS Traders, Aizawl ten CCTV bun hna hi an thawk dawn a, October, 2018 chhunga zawhfel hman tura beisei a ni. Lunglei khawpui chhung hmun pawimawh leh lun lai hmun 20-ah te camera hrang hrang 38 bun a ni ang.