MṬKP-in career guidance buatsaih

Mizoram Ṭhalai Kristian Pawl chuan kumina MṬKP rorelna-a an thu passed bawhzuina kalzelah nimin khan Lunglei Govt. College zirlaite tan career guidance programme an buatsaih.

Inkhawm hi MṬKP committee member R Lalnunthara'n kaihruaiin, thusawitu MṬKP vice president H Lalthangliana chuan zirlaite'n nakina ram leh hnam, kohhran leh khawtlang tana mi ṭangkai tak leh mi hman tlak tak ni thei turin ṭan an lak a ngaih thu sawiin, "Chumi tur chuan MṬKP chuan career fuidance hi zirlaite hnenah buatsaih nise a tih angin vawiin hun pawh hi buatsaih a ni," a ti.

Resource person HATIM-a asst. profeesor Dr. C Lalengzama chuan zirlaite chuan zirlai an nih angin zirna an ngai pawimawh tur anih thu sawiin, "Nimahsela, kan zirna bak piah lamah hian kan in chhiar zau bawk tur a ni," a ti a, thiamna chu sorkar hna zawnna tur atan ringawt a hman tum chuan a hlawhtlin tak tak theih loh thu a sawi.

Dr. C Lalengzama chuan zirlaite chu competitive exam hlau lo tura fuihin, "Sorkar hna ringawt thawk tura bei lo a, kan thiamna hmanga eizawnna kawng dang dap thei tura kan career kan thlan thiam hi a pawimawh tak zet ani tih hria ila. Competitive exam-te hi hlauh tur ani lo a, midangte tih atan pawh dah tur a ni lo. Kan ti ve thei ani tih hria ila, hemi kawngah hian ṭan kan lak a ngai," a ti.