Ram nei lote ram kan pe dawn - PRISM President

PRISM Party Street Campaign chuan Ningani khan Aizawl khawpui chhung hmun hrang hrangah Street Campaign an buatsaih a, an president Vanlalruata chuan sorkarna an siam chuan ram nei lote ram an pek tur thu a sawi.

Vanlalruata chuan land reform khawng tak kalpuiin, hmang ṭangkai lo leh chhiah pawh chawi mumal loa ram zau pui pui neite chhuhsakin a mamawhtu hnenah an hlan dawn thu sawiin, "Ram neih dan mumal lo leh inkhairual lo lutuk hi ṭha kan ti lo. Hetiang hi helna tam ber lo chhuahna bul a ni. Ram ṭha lai ram zau pui pui, tuten emaw an neih si, hman ṭangkai loha awm leh chhiah pawh chawi mumal lohna te hi hman ṭangkai chu ni se kan economy in nasa takin hma a sawn dawn a ni," a ti.

Ram leh hnam tan huaisen taka hma an lak dawn thu sawiin PRISM President chuan, "Hetianga enkawl loh leh chhiah pawh chawi mumal lohna ram te hi kan chhuhsak ang a, a hmang ṭangkai thei tur, a mamawh tu hnenah kan hlan dawn a ni," a ti a, in nei lote in an sak sak tur thu a sawi.