Minister-in Dumlui chakai farm tlawh
Fisheries minister K Lalrinliana chuan nimin khan Dumlui, Kolasib-a chakai farm pilot project a tlawh a, Fisheries department-in Blue Revolution kaltlanga sangha dil an siam ṭhenkhatte a tlawh bawk.
K Lalrinliana chuan, chakai chu Mizote chawhmeh ngainat tak a nih rualin, thianghlim leh mumal taka khawia enkawl a la nih ngai loh avangin, a enchhin nan pilot project anga kalpui a ṭul thu a sawi a, "Dumluia enchhinnaah hian chakai 48,000 vulh theihna hmun tur siam a ni a, hlawhtling taka kalpui a nih chuan SEDP hnuaiah zau zawka kalpui a ni ang," a ti.
Dumluia 'Pilot project on crab culture' hi March 2020 aṭangin kalpui ṭan a ni a, chakai chi a ṭha tura ngaihte lak khawm a, chi thlah tura dah khawm tum a ni. Covid-19 léng vanga inkharkhipna a nih avangin an ruahman lâwk anga kal theih ni lo mah se, chakai eng emaw zat, chi thlah tur lak khawm a ni tawh.