Electoral Roll 2022 tihchhuah a ni ; Mizoramah voter 8,33,426 an awm

Mizoram Electoral Roll 2022 chu January 15, Inrinni khan district tinah district election officer (DEO), bawrhsap ni bawkte'n an tlangzarh. Electoral roll thara a lan danin, Mizoramah voter 8,33,426 an awm a, draft roll-a voter 8,16,137 aiin 17,289 (2.07%)-in a tam zawk.

Electoral Roll 2022-a a lan danin, vote nei mi 8,33,426 zinga 4,04,967 chu mipa niin, mi 4,28,459 chu hmeichhia an ni a, mipa aiin hmeichhia 23,492-in an tam zawk. Service voter 5,061 (mipa 4,975 leh hmeichhia 86) an awm bawk. Mizoramah polling station 1,247 a awm mek.

Mizorama district 11 zing­ah Mamit district-ah chiah hmeichhia aiin mipa an tam zawk a, district dang zawng­ah chuan hmeichhia an tam zawk.

Aizawl district-ah vote nei an tam ber a, mipa 1,29,576 leh hmeichhia 1,46,579 niin, an vaiin mi 2,76,155 an awm a, voter zawng zawng aṭangin 33.13% a tling. Hnahthial district-ah vote nei mipa 7,762 leh hmeichhia 7,968 awmin, an vaiin mi 15,730 an ni a, voter tlemna ber district niin, voter awm zat aṭangin 1.88% chiah a ni.

Final Electoral Roll 2022 hi mahni bialtu ERO, AERO leh BLO-te hnenah emaw, DC/DEO pisaah emaw, CEO website ceo.mizoram.gov.in/view_erolls-ah emaw en theih a ni.

India khua leh tui, January 1, 2022-a kum 18 tling tawh, rokhawlhna avanga electoral roll ennawn laia thun hman lo leh siamṭhat ngai siamṭha duhte tan bialtu ERO/AERO/BLO hnenah dilna thehluh theih a ni. Dilna hi nvsp.in, voterportal.eci.gov.in/ leh Voter Helpline App aṭangin thehluh theih a ni bawk.