MJA-te'n Thingsaiah ráltlânte an tlawh

Aizawl, Lunglei leh Hnahthiala MJA member-te chuan January 15, Inrinni khan Myanmar tualchhung buaina avanga ráltlân, Thingsaia awmte an tlawh a, khawtlang hruaitute nen an inkâwm nghal.

Thingsai khawtlang hruaitute sawi danin, an khua hian March 5, 2021 aṭangin ráltlân an nei ṭan a, nikum September thlaa Myanmar sipaite'n jet fighter hmanga Thinglêr khuaa bomb an thlâk hnuah ráltlân an pung zual. Ráltlân an neih tam ber laiin mi 904 an awm a, tun dinhmunah chuan 355 an awm mek. A tam zawk chuan mi in an luah a, a bak chu camp pathumah awmtir an ni.

Mizoram chhung leh páwn hmun hrang hrang aṭanga ṭanpuina an dawn tling khawm hmangin ráltlânte chu ṭanpuina pek ṭhin an ni a; ráltlânte chu temporary ration card siamsak niin, chawlhkar hnih danah buhfai pek ṭhin an ni.

Hetih lai hian, ráltlân chhungkaw ṭhenkhat chuan ram páwna an chhungte aṭangin ṭanpuina an dawn ṭhat avang leh neinung tak tak an awm avangin, chu'ng mite chu puih an ni lo.

Buh leh hmarchha seng hun laiin khawtlang hruaitute remtihnain Myanmar lamah an chho ṭhin a, ṭhenkhatin an hmarcha leh buhte Thingsai lamah an hawn laiin, ṭhenkhat chuan an ramah an thukru thung.

Ráltlânte hi a tìrah chuan an rawn luh hlimin khung hran phawt an ni a, ni sarih hnuah RAT hmanga enfiah niin, an negative chuan ráltlân dang bulah dah an ni. Tun dinhmunah chuan khung hranna turte a buaithlak tham avangin khung hran an ni tawh lo a, RAT hmangin an la enfiah zel tho a ni.

Zawhna chhangin Thingsai khawtlang hruaitute leh police-te chuan, ráltlânte avangin ruihhlo a pun phaha an hriat loh thu an sawi a, “An hâk lai nen chauha rawn kalte an ni a, endik vak pawh an ngai lo. Chutih rualin, Myanmar nena inkalpawhna eng emaw zat a awm avangin ruihhlo tawlh rûk hi chu a awm rengin kan hria. Kal khàn a tam si a, police an tam si lo a, vèn hneh theih a ni lo,” an ti.

Thingsai khawtlang hruaitute chuan, MJA member-te hnenah hian an khawtlang harsatna leh mamawh hrang hrangte an thlen nghal a, theihtawpa hmalakpui turin an ngen a ni.

Thingsai mamawh ṭhenkhat
 Ramria awm an nih avangin border trade route
 Ruihhlo tawlh rûk veng turin police station changtlung zawk
 Tui hnianghnâr zawka an neih theihna atan tui pump-na ṭha
 Department tam zawk Thingsaia dah