DC pahnih sawn an nih chhanah Thil dik lo awmah kan ngai - ZPM

ZPM hruaitute chuan January 15, Inrinni khan Champhai Press Club-ah thuthar thehdarhtute an kâwm a; Champhai leh Kolasib DC sawn an nih chhanah thil dik lo inthup lian tak inphûm a awm ngeia mipuiin an hriat thu an sawi.

ZPM working president K Sapdanga chuan, January 13, 2022-a senior officer sîksawi zinga tel Champhai DC leh Kolasib DC sawn tel ve an ni chu thuneitute lungawi lo inhrosakna ni ngeiin mipuiin an hria tih a sawi a, "Thuneitute lungawi loh chhan chu an thupek an âwih loh vang ni loin, thu petute thupek anga an thawh ṭhat lutuk vang niin a lang," a ti.

K Sapdanga chuan, Kolasib DC chuan national highway zauh turah zangnadawmna dik lo taka lâk tumte a dodal avangin mipui ṭan a hlawh tih sawiin, "Ramri vên hnaah pawh Assam sorkar hnawk tih khawpin a thawk ṭha a ni," a ti a; Mizoram CM leh Assam CM inbiak hnu lawka Kolasib DC sawn a ni tur chu ṭhenawm state aṭangin nawrna Mizoram sorkar hian a dawng em ni tih ngaihtuah theih hial a nih thu a sawi.

Revenue minister Lalruatkima'n, 'Champhai DC tih chu sorkar tih a ni' tia a sawi thu tarlangin Sapdanga chuan, "Hmanhmawh taka sawn a ni leh si chu thu petute thupek zawm chin tur a thliar thiam loh avang niin kan hria," a ti.

ZPM Working President chuan Champhai DC sawn chhan chu naupang chenin an hriat dik vek an rin thu sawiin, "Sawifiah tum aiin sawifiah lohin a fiah zawk àwm e. Champhai leh Kolasib DC-te transfer hi thuneitute lungawi lo inhrosakna ni ngeiin a lang. Kan ramah hian sorkar ṭha a pian a, danin awmzia a neih a, mipuite'n kan dikna leh kan chanvo kan chan hun a nghahhlelhawm tawh hle a ni," a ti a; sorkar ṭha hnuaiah chuan mipui leh sorkar hnathawkte an zalên ṭhin tih a sawi.

ZPM Working President hi MLA pahnih Dr Vanlalthlana leh VL Zaithanzama bakah, ZPM PAC member TBC Lalvenchhunga, general secretary R Lalchhuanmawia leh hruaitu dangte'n an ṭawiawm a ni.

Thuthar thehdarhtute an kawm zawhah ZPM hruaitute hian Champhaia Mizoram police duty outpost leh Assam Rifles duty outpost-te an tlawh nghal a; tun hnaia sawi hlawh tak kuhva tawlh rûk chungchanga thil awm dan leh thlen dante a hmunah kalin an enfiah bawk.