ICMR-in Lungleia RT-PCR lab. a pawm ; Sorkarin hripui vanga thi 383 a rál tawh

Lungleia RT-PCR laboratory bun thar chu Indian Council of Medical Research (ICMR)-in a pawmpui tawh a; sorkar laipui thuchhuak angin Mizorama Covid-19 vanga thi mi 383 hnenah sorkar aṭangin ràlna Rs 50,000 ṭheuh pek a ni tawh.

Health minister Dr R Lalthangliana hoin January 15, Inrinni khan Secretariat conference hall-ah sorkar leh pawl ṭhenkhat hruaitute'n Mizorama Covid-19 dinhmun an sawiho. ICMR-in Lungleia RT-PCR laboratory a pawmpui tawh thu tarlan a ni a; Mizorama Covid-19 vanga thi mi 383 hnenah ràlna Rs 50,000 ṭheuh pek a nih tawh thu leh mi dangte pawh pek tura buaipui mek a nih thu tarlan a ni bawk.

Ṭhutkhawmah hian, tun hnai chawlhkar hnih chhunga Covid-19 positivity rate chu 15%-20% inkar a nih thu sawi niin, "Kan dinhmun a thlamuanthlak lo hle. Inkaihhruaina thar a hma aia khauh deuh zawka duan chu kar khat vel kan hmang leh tawh a, a aia khauh lehzuala kal hi phurrit a nih ṭhin avangin a pumpelh nan mi tinin SOP kan zawm ṭhat a ṭul," an ti a; Mizo zingah zunthlum leh thisen sang nei an tam avangin mahni dinhmun chîk a pawimawh thu an sawi.

Task Group on Insurance hnuaiah LTF/VTF zinga Covid-19 dona aṭanga hripui kaia thi zui ta mi pahnih râlna tur Rs 20,00,000 ve ve pek chhuah a ni tawh a, mi dang pakhat ràlna tur buaipui mek a ni.

Dawr hawn dan, zan inkhawm leh inkhawmnaa him taka zaiho theih dan tur chungchanga rawtna te, ruihhlo ngai khung hran (quarantine) ṭulte buaipui dan tur te, task force siamṭhat dan turte sawiho a ni a; hripui léng dinhmun enin, district hospital tinah ICU khum dah a ṭul dan leh naupangte pual bik PICU/NICU chungchangte sawiho a ni bawk.

Ṭhutkhawmah hian Home minister Lalchamliana, Medical Operation Team chairman Dr ZR Thiamsanga, MLA, MLA K Laldawngliana, chief secretary Dr Renu Sharma, Finance secretary Vanlalchhuanga, Planning secretary Lalmalsawma Pachuau, DMR secretary Vanlalngaihsaka, Health secretary R Lalramnghaka, Aizawl DC Dr Lalhriatzuali Ralte te bakah, sorkar department hotute leh Central YMA, MKHC, Aizawl City Local Council Association, IMA, MIMA leh MBCC aiawhte an tel a ni.

Ṭhutkhawma sawi dangte
 Mizoram sorkarin mobile RT-PCR van a dawn, Bhubaneswar-a siam chu Mizoram panpui mek a ni.
 Ram dang aṭanga Mizorama haw mi 242 an awm tawh a, ni sarih khung hran an nih hnuah RT-PCR hmangin endik an ni. Mi 242 zinga 16-in hripui an vei a, endik hmabak 29 an awm.
 Ram dang aṭanga rawn lut hripui vei mi 16 zinga genomic sequencing tura thawn tawh zingah Omicron vei an la awm lo.
 Tun hnaia Mizoram páwn aṭanga rawn lut zingah chawhrualin ni tin Covid-19 positive 38 hmuh chhuah ang a ni.
 Mega Kiosk, Vanapa Hall-a mi chu hmun danga sawn tum a ni a, a hmun tur dap mek a ni.
 Mega Kiosk hi RAT leh FIA hmanga sample endikna a ni a, RT-PCR hmanga endik tura sample lak theih nan duan tum a ni.