Covid-19 vangin mi 570 thi tawh

Nimin khan tlai dar 5 thlengin Covid-19 vanga thi an awm lo a; January 15, Inrinni khan mi pahnih an thih bakah, January 14, Zirtawpniah thi pahnih an awm belh bawk. Mizoramah hripui vangin mi 570 an thi tawh a, tun January thla bikah mi 24 an thi tawh.

January 14, Zirtawpni tlai dar 4:03 khan Michelle Vanlalruati (36), Keifang chu State Refferal Hospital-ah a thi a, Covid-19 a vei tih January 5, 2022 khan hmuh chhuah niin, January 11 khan dah luh a ni. Myanmar aṭanga rawn lut Zungtul (100), Lawngtlai Kanan Veng pawh January 14 khan hripui a vei tih finfiah a nih hnu lawk, tlai dar 5:30 khan refugee camp (trade centre), Lawngtlaiah a thi bawk.

January 15, Inrinni zan dar 8 khan Zahranga (76), Thenzawl chu SRH-ah hripui vangin a thi a, natna dang nei tel a ni. Covid-19 positive a ni tih January 7 khan hmuh chhuah niin, January 8 aṭangin SRH-ah enkawl a ni. Thanzingi (75), Rabung, Khawzawl district pawh Inrinni zan dar 8:20 khan hripui vangin a thi a; Covid-19 vei a ni tih Inrinni chhun lamah finfiah niin, inah an inenkawl a, natna dang nei tel a ni.