January thlaah Covid-19 vei 10,590 hmu tawh

Mizoramah Covid-19 vei January 14, Zirtawpni khan mi 842 leh January 15, Inrinni khan mi 875 hmuh chhuah a ni a, an vaiin mi 1,717 an ni. January thla chhungin mi 10,590 hmuh a ni tawh. Inrinni khan hripui vangin mi pahnih an thi.

Covid-19 vei January 14-a hmuh chhuahte chu mipa 360 leh hmeichhia 482 niin, ZMC laboratory-a hmuh 58, TrueNAT hmanga hmuh 62, RAT hmanga hmuh 689 leh FIA hmanga hmuh 33 an ni a; symptom nei 527 leh nei lo 315 an ni.

Inrinnia hripui vei hmuh tharte chu mipa 390 leh hmeichhia 485 an ni a; ZMC-ah hmuh 60, TrueNAT hmanga hmuh 91, RAT hmanga hmuh 698 leh FIA hmanga hmuh 26 niin, symptom nei 549 leh nei lo 326 an ni.

IPR tarlan danin, hripui vei Zirtawpnia hmuh chhuah zinga mi 20 aia tam hmuhna thingtlang khua paruk a awm a, Inrinnia hmuh zingah mi 20 aia tam hmuhna thingtlang khua pali a awm bawk a; an zinga a tam ber chu symptom nei an ni.

State páwn aṭanga rawn lut, Lengpui Airport-a RAT hmanga sample endik zingah Covid-19 positive an pung zel a; January 14 khan mi 21 hmuh chhuah a ni a, January 15 khan mi 54 hmuh a ni bawk.

IDSP record angin, Mizoramah Covid-19 vei 1,52,255 hmuh chhuah a ni tawh a, mipa 72,981 leh hmeichhia 79,274 an ni a, mipa aiin hmeichhia 6,293-in an tam zawk.

Kum 2011 chhiarpui aṭanga chhûtin, Mizorama Covid-19 vei hmuh tawh 1,52,255 chu mi 1,000 zelah hripui vei mi 138 an awm ang a ni a; mi 1,00,000 zela Covid-19 vangin mi 52 an thi tawh ang a ni tih sorkar thuchhuakin a tarlang.