TB Awareness Campaign buatsaih

Azadi Ka Amrit Mahotsav pualin January 14, Zirtawpni khan Lawngtlai DC conference hall-ah ngawr (tuberculosis) natna chungchang zirhona, TB Awareness Campaign buatsaih a ni a, Lawngtlai District TB Forum chairman Dr Andrew H Vanlaldika, bawrhsap ni bawkin a hmanpui.

Dr Andrew H Vanlaldika chuan, tun hmain ngawr natna chu tihdam theih loh leh thihpui ngei ngei tura ngaih ṭhin a ni tih sawiin, “Tunah erawh chuan a hun taka a dan dik taka enkawl a nih chuan thihpui loh tura ngaih a ni tawh. Lawngtlai district-a TB ûm bo a nih theih nana thawktute bakah, tlawmngai pawl leh mipui ṭanrual a pawimawh hle,” a ti a; zau zawka TB chungchang inzirtir a, khawtlanga TB veite thinhrikna awm ṭhin tibo tura theihtawpa hmalak a ṭul thu a sawi.

Campaign-a tarlan danin, Lawngtlai district-ah kum 2015-2021 chhungin TB vei mi 739 hmuh chhuah a ni a, chu’ng zinga 683 (92.42%) chu enkawl dam niin, mi 18 (2.43%) an thi a, enkawl mek mi 34 (4.60%) an awm.

TB damdawi ei ṭhat loh vang leh chhan dang vanga damdawiin hna a thawh ṭhat theih lohna, Multi Drug Resistant TB (MDR-TB) vei mi 11 hmuh chhuah a ni tawh a, mi 10 enkawl dam tawh niin, mi pakhat a thi thung.

TB hrik enna leh damlo enkawlna chu sorkarah a thlâwn vek a tih theih a ni a; damdawi ei chhung (thla ruk) zawng thla tin Rs 500 pek niin, an inenkawl zawhah Rs 750 pek ṭhin an ni.

TB hi chuap TB (pulmonary) leh chuap páwn lam TB (extra pulmonary) tiin thliar a ni a; chuap TB (an khâka hrik hmuhte) chauhin mi dang an kài chhâwng theia ngaih a nih rualin, ni 10-14 chhung damdawi an ei hnuah mi dang an kài chhâwng thei tawh lo tura ngaih a ni bawk.