KHAWTHLIR

Assembly session
Governor Dr Hari Babu Kambhampati chuan Mizoram Legislative Assembly pariatna session vawi kuana chu February 22, 2022-a ṭan turin a ko. Assembly session hi February 22 chawhma dar 10:30-ah ṭan tur niin, a rei zawng tur tarlan a ni lo.

Thisen pe
January 15, Inrinni khan KṬP, Sakawrtuichhun Pastor Bialte'n Aizawl Civil Hospital tan thisen unit 55 an pe a, petute mipa 44 leh hmeichhia 11 an ni a; Mizoram PYD, Durtlang Pastor Bialte pawhin Synod Hospital tan unit 27 an pe a, petute mipa 23 leh hmeichhia pali an ni. LIKBK Ṭhalai Pawl, Lawngtlai Bazar Pastor Bialin District Hospital tan thisen unit 25 pein, petute mipa 23 leh hmeichhia pahnih an ni a; Evangelical Church of Maraland KTP, Amobyu Pastor Bial pawhin District Hospital tan unit 25 pein, petute mipa 23 leh hmeichhia pahnih an ni.

Dy CM-in tlawh
Deputy chief minister Tawnluia chuan January 15, Inrinni khan Integrated Command and Control Centre for Aizawl Smart City Limited a tlawh.

Lawmpuina hlàn
Lawngtlai district aṭanga Mizoram Civil Services (Combined Competitive) Preliminary Examination 2021-a tling mi 18-te chu January 15, Inrinni khan Lawngtlai bawrhsap Dr Andrew H Vanlaldika'n DC conference hall-ah lawmpuina a hlàn.

CM Instagram comment khar
Chief minister Zoramthanga Instagram account chu January 13 zan aṭangin comment theih lohin khar a ni a; hei hi Champhai DC Maria CT Zuali transfer chungchangah CM Instagram lamah lungawi lohna thu ziak (comment) a tam vang niin a lang a, nimin tlai thleng khan CM Instagram-ah hian mipuiin comment an la pe thei lo a ni.