Kolasib DC sawnna dodal tum lo ; Sawn hun tihkhawtlai duh thung

Kolasib District All NGO Coordination Committee chuan Kolasib DC Dr H Lalthlangliana Aizawla sawnna tur thupek chhuak tawh chu dodal an tum lo a, insawn hun erawh tikhawtlai turin Chief Minister dil an tum.

Kolasib District Joint NGO hi January 15, Inrinni zan khan YMA Sub-Headquarters, Kolasib pisaah an ṭhukhawm a, Sub-Hqrs YMA president Thomas D Lalengliana'n a kaihruai a, Kolasib DC Dr H Lalthlangliana sawn chhuahna tur thupek sorkarin January 13, 2022-a a tihchhuah chungchang an ngaihtuah a ni.

Kolasib aṭanga thu dawn danin, Kolasib District Joint NGO chuan, sorkar hnathawkte chu sawn theih an nih avangin DC Dr H Lalthlangliana sawnna thupek pawh dodal an tum lo a; chutih rualin, ramri chungchangahte hmalakna pawimawh tak tak a neih rih avangin sawn hun pawh tlai deuh a nih theih nan chief minister Zoramthanga hmuha ngen an rél a ni.

Kolasib-a MJA hruaitute sawi danin, Kolasib All NGO chuan, Kolasib DC sawn chhuah chu a la hun loa an ngaih thu ṭhutkhawmah sawi a ni a; Mizoram leh Assam ramri leh Covid-19 chungchanga hmalakna a neih laklawh takte avangin hun eng emaw chhung chu transfer order delay turin CM leh Dy CM-ah ngenna thlen ni se, an ti. Hun remchang a awm a nih chuan vawiinah CM Zoramthanga hmuh nghal an rél bawk.