Lunglei ṭhalai leh Khawbung YMA-in Champhai DC sawn rih lo turin ngen

Lunglei Ṭhalai Pawl (LṬP) chuan thuchhuah siamin, Champhai bawrhsap Maria CT Zuali sawn chhuah chungchangah thil dik lo lian tak a awma an hriat thu an tarlang a, transfer order sût turin Mizoram sorkar an ngen.

LṬP chuan, Maria CT Zuali sawn chhuah tum chhan chu, dan bawhchhetute'n Mizo mipui zahpah miah lo leh ram leh hnam hmangaih hauh lo leh mahni hmasial taka hma an lâk vang nia an hriat thu an sawi a, "Mizorama thil dik lo thleng reng reng chu kan dodal a, ram chhung khawi hmunah pawh thil dik lo leh mi dik lote bei lêt tura che chhuak turin kan inpeih reng a ni," an ti.

Khawbung Branch YMA pawhin thuchhuah siamin, district bawrhsap Maria CT Zuali chu district mipui tana ṭhahnemngai, intodelhna tura theihtawp chhuahtu, kuthnathawktute intodelh tura ṭan laa kawng kawhhmuhtu a nih avangin an ui thu an tarlang a, "Dan leh thupek ngai pawimawh mi leh ram leh mipui tana dikna tun din duha hma a lak mek laia sawn a ni hi pawi kan ti a, sorkar hian hun ṭha zawk nghakin sawn lo se kan ti," an ti.

Khawbung YMA chuan, Khawbung paltlang kawngpui CNV Road (Champhai-Tuipui) siam mek chu dan loa kuhva phurte'n an chìl chhiat nasat avangin dan loa kuhva phurtute chu Khawbung paltlang lo turin an ngen a; dan loa kuhva tawlh chungchanga Central YMA hmalakna chu an thlawp thu an tarlang bawk.