Micro containment area-a puan ngai eng emaw zat a awm

January 15, Inrinni khan Aizawl district bawrhsap Dr Lalhriatzuali Ralte kaihhruaiin a pisaah sorkar leh tlawmngai pawl hruaitute’n Aizawl district-a Covid-19 darh donaa hmalak dan tur an sawiho. Hri inkai chhâwn zel tur danchah nana micro containment area-a puan ngai khua/veng eng emaw zat a awm thu an sawi.

Ṭhutkhawmah hian sorkarin inkaihhruaina a siamte Aizawl district-ah khauh leh uluk zawka kenkawh an rél a; task force-te tihchak dan tur leh inkaihhruaina ṭha zawka zawm a nih theih nan inzirtirna neih dan turte an rel a ni.

Khua/veng tinah CAB Implementation Team din ni se, an ti a; local/village task force-te chu din turin Aizawl DC chuan ngenna leh hriattirna January 15 khan a tichhuak nghal a ni.