Kuhva tawlh rûk dan Larsap sawipui

BJP, Mizoram Pradesh president Vanlalhmuaka, vice president Dr BD Chakma, MLA leh vice president dang JB Rualchhinga te chuan January 14, 2022 khan Governor Dr Kambhampati Hari Babu chu a pisaah an hmu a; Mizorama hna hrang hrang thawh mekte leh kuhva rah tawlh rûk chungchangte an sawipui.

Vanlalhmuaka chuan, Mizorama national highway km. 730 chuang siam mekte chu a hun taka zawh a nih theih nan harsatna awm mek leh awm theite a hrilh a; NH siam mekah hian Mizoram leilung fa contractor-te’n an thawh ve theihna atan sorkar laipuia a thlen tawh chu bawhzuipui tur leh Mizo thawh theih âwm awmah Mizote duhsak a nih theih nan hma lakpui turin a ngen.

Bairabi leh Sairang rêl kawng siam mekah hna a muan avang leh rêl kawng siamnaa ram neitute’n harsatna an tawhte Railways Minister hnena a thlen tawh pawh bawhzuipui turin a ngen bawk.

BJP hruaitute chuan, MGNREGS leh central scheme dangtea thil dik lo awmte document an neih thu leh a ṭul anga hma an lâk tur thu Larsap an hrilh a; Myanmar aṭanga dan loa kuhva tawlh rûk hmanga sumdawnna lian tak kalpui mek chu Mizo hmingchhiat theihna a nih avangin inrawlh vat tur in Governor an ngen bawk.