Mizorama hruai kîr duh Bru Chhungkaw pathum an awm

Tripura relief camp-a awm Bru, Mizoram khua leh tuite hruai kîr hna chu August 25, Inrinni khan ṭan a ni a, chhungkaw pakhat chiah Mizoramah hruai kir an ni. Vawiin hian chhungkaw pahnih hruai kîr leh an ni ang.

Bru camp-a kal Home joint secretary Lalbiaksangi hnen aṭanga thu dawn danin, Mizorama hruai kîr tak chhungkaw pakhat hi Putlungasih, Lunglei district-a awm tur an ni. Chhungkaw pahnih dangin Mizorama kîr an duh thu an sawi ve leh a, anni hi vawiinah hruai kir tum niin, Kolasib district-a awm tur an ni.

Vawiina chhungkaw pahnih hruai kir an nih zawh hian Mizoram aṭanga hruai kir hna thawk tura relief camp-a kal official-te chuan Mizoram an rawn pan ve nghal dawn a ni.

Tripura relief camp-ah hian Home department hotute bakah, Lunglei district leh Kolasib district-a official-te an kal a, Mamit district official-te erawh an district-a let duh an awm loh avangin an kal lo.

Bru lâk lêt hna thawh a nih hma hian Mizoram sorkar official-te chu relief camp-ah kalin, Mizorama kîr an duh leh duh loh chhungkaw tin an zawt a; chhungkaw 5,407 zinga chhungkaw 423 chuan kîr an duh thu an sawi. Mahse, hruai kir hna thawh a nih hnuah chuan chhungkaw pathum chiah kîr duh an awm a ni.

Union Home minister Rajnath Singh hoa Mizoram leh Tripura chief minister-te leh Mizoram Bru Displaced People Forum (MBDPF) president-te'n July 2, 2018-a New Delhi-a Draft Agreement an siam ang chuan, Mizorama kîr Bru-te chu ṭanpuina leh chhawmdawlna sum chhungkaw pakhat tana pek tura ruahman zawng zawng hi Rs. 6,70,000 a tling.

Draft Agreement-a a inziah dan chuan, Mizorama let Bru chhungkaw tin hnenah Rs. 4,00,000 pek tur a ni a, hei hi bank-ah dah tur niin, kum thum hnua lak chhuah theih chauh tura tih a ni.

Cash assistance kum hnih chhung thla tin Rs. 5,000 (kum hnih chhungin Rs. 1,20,000), in sakna tur (house building assistance) Rs. 1,50,000 ṭheuh, kum hnih chhung a thlawnin ration pek leh Tripura aṭanga Mizorama an lêtna senso (transportation) Mizoram sorkarin a tumsakte a tel.

Heng bakah hian, Mizorama rawn let Bru-te chu Mizorama mi dangte ang bawkin an lo tur ram pek an ni dawn a, in an sakna tur ram ft. 40X30-a zau te, NLUP ṭanpuinate pek tur an ni. Heng bakahah hian, an tana sorkarin a tihsak tur a la awm nual.